Rafiq Tağının qardaşı Baş Prokurorluğa çağırıldı

Mərhum yazıçı-publisist Rafiq Tağının qardaşı İlqar Tağıyev Baş Prokurorluğa çağırılaraq, qəbul edilib. Bunu Modern.az saytına açıqlamasında İlqar Tağıyev deyib.

Hələ ötən ilin noyabrında vurulan teleqramda baş prokurorla görüşmək, ondan bu günə qədər hansı əməliyyat-axtarış tədbirlərinin aparıldığı, hansı ipuclarının araşdırıldığı, nələrin tapıldığı, hansı şübhəli məqamların olduğu barədə məlumat almaq istənilib.

İlqar Tağıyev görüşün ötən ay baş tutduğunu deyib: "Baş Prokurorluqda müavinlərin birinin qəbulunda oldum. Görüşdə Rafiq Tağının qətlinin istintaqını aparan müstəntiq Nadir Mirzəyev də iştirak edirdi. Dinləmədə bildirdim ki, istintaq davam edən müddətdə vəsatətlərimiz təmin olunmayıb, istintaq müddətində bəzi məqamlara etirazımı bildirdim. Mənə dedilər ki, vəsatətlərinizi yenidən yazın verin. Aydındır ki, istintaq bu qətlin ört-basdır edilməsi istiqamətində aparılır. Dəfələrlə vəsatətlər vermişik, heç birinə də müsbət cavab verilməyib. Yenidən vəsatət qaldırmağın, yenidən yazmağın nə mənası var?

Şablon cavablar, nəzakətli qarşılama, boş vədlər, qeri-müəyyənliklər... Cinayətin üstünün açılmasına ümidimiz qalmayıb. Nə zaman baxılacaq, cinayyətin üstü nə vaxt açılacaq, bilinmir. Verilən cavablar da bizi qane etmir. Avropa İnsan Hüquqları Məhkəməsinə olunan müraciətə hələ ki, reaksiya yoxdur”.

İlqar Tağıyev qardaşının ailəsinin heç bir dövlət yardımı almadan, yaxınlarının köməyi ilə dolandığını da deyib.

Rafiq Tağı 2011-ci il noyabrın 19-da Bakıda bıçaqlanıb, noyabrın 23-də isə müalicə olunduğu xəstəxanada dünyasını dəyişib. İndiyədək bu cinayətə görə məsuliyyətə cəlb edilən olmayıb. İstintaqı aparan Baş Prokurorluğun Ağır Cinayətlərə Dair İşlər üzrə İstintaq İdarəsi 2014-cü il yanvarın 8-də cinayət işi üzrə icraatı dayandırıb. Bu qərardan məhkəməyə verilən şikayət təmin olunmayıb.

ANN.Az