2000 manatlıq müsabiqəyə start verildi

Elektron Hökumət Portalı mobil əlavələrin hazırlanması üçün müsabiqə elan edib.
 
Rabitə və Yüksək Texnologiyalar Nazirliyindən Axar.az-a verilən məlumata görə, Elektron Hökumət Portalının operatoru – Rabitə və Yüksək Texnologiyalar Nazirliyinin Məlumat Hesablama Mərkəziwww.data.gov.az portalının açıq məlumatlarından istifadə etməklə "Bax, istifadə et və yarat" adlı mobil əlavələrin hazırlanması müsabiqəsini elan edir.
 
İKT mütəxəssisləri, START UP-çılar, tələbələr və s. üçün nəzərdə tutulan, yanvarın 15-dən aprelin 15-nə qədər davam edəcək bu müsabiqəyə qatılmaq üçün açıq məlumatlardan istifadə edərək ictimai əhəmiyyətli mobil proqramlar yaradıb müsabiqəyə təqdim etmək lazımdır.
 
Müsabiqənin tələbləri:
 
Müsabiqəyə təqdim ediləcək mobil əlavələrin hazırlanması üçün www.data.gov.az portalına daxil olmaqla açıq məlumatlar siyahısından istifadə etməlisiniz.
 
Müsabiqədə iştirak etmək istəyənlər ilk növbədə www.e-gov.az portalında qeydiyyatdan keçməli, materialları göndərərkən qeydiyyat nömrəsini e-məktuba əlavə etməlidir. Qeydiyyat 2015-ci il martın 15-dək aparılacaq. Materialların son qəbul olunma tarixi aprel ayının 15-dir.
 
Müsabiqə üçün hazırlanmış materiallar bu ünvana göndərilməlidir - [email protected].
 
Qalibləri 1-ci yer üçün 2000 manat, 2-ci yer  üçün 1000 manat, 3-cü yer üçün 500 manat pul gözləyir.
 
Müsabiqə 15 yanvar 2015 cü ildən 15 aprel 2015-ci ilə qədər davam edəcək, materiallar RYTN tərəfindən müəyyən edilmiş peşəkar münsiflər tərəfindən qiymətləndiriləcək.