Qüsurla doğulan uşaqlar barədə AÇIQLAMA

Əvvəlki illərdə necə olubsa, bu gün də qüsurla doğulan uşaqların sayı eynidir”. Bu sözləri Modern.az-a açıqlamasında ölkənin baş pediatrı Nəsib Quliyev deyib. O qeyd edib ki, Azərbaycanda qüsurlu doğulan uşaqların arasında birinci yerdə ürək, qan-damar sistemi problemləri olan körpələr durur. İkinci yerdə böyrəklər, sidikçıxarıcı orqanların anadangəlmə qüsurları olan uşaqlar dayanır.

"Sonrakı yerlərdə isə sifət, üz nahiyyəsində, gövdə, ayaq, barmaqlarda qüsurlar olan yeni doğlumuş körpələr dayanır. İnkişaf qüsurlarının çoxsaylı səbəbləri var. Bu, hamilə zamanı bətn daxilində, dölün embrional dövründə , hamiləliyin ilk trimestri, yəni 3 aylığında embrionun inkişafında olan problemlərlə bağlı ola bilər. Buna infeksiya və ya hər hansısa xəstəlik, ananın qidalanması, ümumi halı da təsir göstərə bilər. Yəni uşaqların qüsurlu doğlumasının bilavasitə səbəbi aşkar deyil, amma ona şərait yaradan faktorlar məlumdur. Bu gün qızılca-məxmərəyə qarşı peyvənd aparılır. Əgər hamilə qadın qızılca-məxmərəyə hamiləliyin birinci trimestirində yoluxursa, onda uşaqlar qüsurla doğulur, yəni bədənin inkişafının müəyyən hissəsi pozulur”.

N.Quliyev qeyd edib ki, istənilən qüsur anadangəlmə və sonradan qazanılma, yəni keçirdiyi xəstəliyin nəticəsində qazanılan qüsurlar da ola bilir. 

"Eşitmə, danışma, görmə qüsurları da anadangəlmə və ya sonradan qazanılma ola bilər, bunlar mürəkkəb qüsurlardır və təəssüf ki, bunların da bilavasitə səbəbləri bilinmir. Eyni zamanda onların diaqnozunu qoymaq da sadə deyil.

Bu cür probləmlərin qarşısını almaq üçün profilaktik tədbirlər görülməlidir. Azərbaycanda uşaqların icbari dispanserizasiyasının tətbiqi bu məqsədi güdür ki, uşaqların üstündə insanların, valideyinlərin, həkimlərin məsuliyyəti bir daha artsın”.