Azərbaycanda dərmanların 90%-nin qiyməti düşəcək

Toplantıda müvafiq tədbirlərin hazırlanması və onların ətrafında zəruri addımların atılması tapşırığı verilib. Bu günlərdə Səhiyyə Nazirliyində görülmüş işlərə dair müşavirə keçirilib.

Oxu.Az-ın məlumatına görə, səhiyyə nazirinin müavini Elsevər Ağayev ictimaiyyəti maraqlandıran bütün sualları cavablandırıb.

E.Ağayevin sözlərinə görə, Tarif Şurasının 30 iyul qərarı ilə ölkədə 250-dən artıq ən vacib dərman vasitəsinin qiyməti tənzimlənib.:

"Bu qərarın əsas məqsədi əhalinin dərman alışına çəkdiyi xərclərinin azaldılması, eyni dərman preparatlarının ölkənin bütün apteklərində vahid qiymətə satılmasıdır”.

Nazir müavini yeni satış qiymətlərinin sentyabr ayının 15-dən qüvvəyə minəcəyini də bəyan edib.

"Qərar qüvvəyə mindikdən sonra tənzimlənən siyahıya daxil olan dərman vasitələrinin 20%-nin qiyməti 3 dəfədən çox, 40%-dən çoxunun qiyməti isə 2 dəfədən çox aşağı salınacaqdır. Ümumilikdə isə tənzimlənən dərman vasitələrinin 90%-nin qiyməti düşəcəkdir”.  

E.Ağayev bildirib ki, Tarif Şurasının təsdiq etdiyi ilkin mərhələdə bu siyahıya əhali arasında ən çox rast gəlinən xəstəliklərin müalicəsi üçün dərman preparatları daxil edilib:

"İlin sonuna qədər Tarif Şurası tərəfindən Səhiyyə Nazirliyində qeydiyyatdan keçən dərman preparatlarının böyük əksəriyyətinin, gələn ilin mart ayına kimi isə bütün preparatların qiymətlərinin tənzimlənməsi tamamlanacaq”.