Lisenziyaların ləğv edilməsi devalvasiya ilə əlaqədardır - EKSPERT

"Vəziyyət tək lisenziyaların ləğv edilməsi ilə məhdudlaşsa, bunun iqtisadiyyata heç bir təsiri olmayacaq” – bunu iqtisadçı ekspert Natiq Cəfərli ANN.Az-a açıqlamasında deyib.

ANN.Az  xəbər verir ki, bu gün prezident İlham Əliyevin imzaladığı "Lisenziyalaşdırma sahəsində bəzi tədbirlər haqqında" fərmana əsasən, ölkədə fəaliyyət növlərinə lisenziya verilməsinə görə ödənilən dövlət rüsumlarının məbləği aşağı endirilib. Bəzi sahələrdə isə (misal üçün, tütün məmulatlarının və alkoqollu içkilərin istehsalı, idxalı və satışı üçün) lisenziyalar verilməsi ümumiyyətlə ləğv edilib.

Lisenziyaların ləğv edilməsinin iqtisadiyyata təsiri necə olacaq? Lisenziyaların ləğv edilməsinin dekabrın 21-də baş verən devalvasiya ilə əlaqəsi varmı? Bu proses iş adamlarına necə təsir göstərəcək?

"Lisenziyaların azaldılması və ya ləğv edilməsi ilə bağlı təkliflər çoxdan irəli sürülmüşdü. Lisenziyaların ləğv edilməsi pozitiv addım olsa da, bununla yanaşı digər tədbirlər də görülməlidir ki, təsirli olsun. Bu ləğv edilmə qısa müddətli müəyyən məsələlərə təsir edə bilər. Bunun bir ardıcıllığı olmalıdır,  məsələn vergidə, gömrükdə paralel addımlar atılmalıdır. Vəziyyət tək lisenziyaların ləğv edilməsi ilə məhdudlaşsa, bunun iqtisadiyyata, biznes mühitinə təsiri olmayacaq”. 

Natiq Cəfərli lisenziyaların ləğv edilməsinin iş adamlarına müsbət təsir edəcəyini xüsusi vurğulayıb: "Birinci üstünlük odur ki, iş adamlarının bəzi xərcləri azalacaq, ya da tamamilə ləğv olunacaq. Digər üstünlük isə onların obyektlərinin yoxlamağa gələn dövlət və hökumət qurumlarının işinə son qoyulmasıdır. Çünki bəzən lisenziyanı bəhanə edən müxtəlif təşkilatlar biznesin işinə müdaxilə edirdilər. Bu sadalanan hallara görə yaxşı addımdır. Ancaq ciddi effektə nail olmaq üçün digər addımlar mütləq atılmalıdır. Ümumiyyətlə, hökumətin anti-böhran planı olmalıdır, bu planın tərkib hissəsi kimi addımlar ard–arda atılmalıdır. Amma görünən odur ki, düzən yoxdur. Yəni plan yoxdur ki, ona baxıb addımlar atılsın. Çox təəssüf ki, bu halları görmürük”. 

Ekspert sonda lisenziyaların ləğv edilməsinin, devalvasiya ilə bir başa əlaqəsi olduğunu da qeyd edib.