Azərbaycanda 200-lük, 500-lük manat buraxıla bilərmi? - AÇIQLAMA

Prosesin gedişatında inflyasiyanın yüksəlməsi və dolların manat qarşısında daha da möhkəmlənməsi fonunda 200-lük, 500-lük, 1000-lik kimi yeni nominallı əskinaslara ehtiyac yarana bilərmi?

Xatırladaq ki, 1992-1996-cı illər ərzində Azərbaycanda 1, 5, 10, 50, 100, 250, 500, 1 000, 10 000, 50 000-lik əskinaslar dövriyyədə olub.

Öılə başçısının müvafiq Fərmana uyğun olaraq 2006-cı il yanvarın 1-dən etibarən yeni nəsil pul nişanları dövriyyəyə buraxılıb. Yeni manata keçid zamanı 1 yeni manat 5000 köhnə manata bərabər tutulub. Məhz o zaman yeni 1, 5, 10, 20, 50, 100-lük əskinaslar dövriyyəyə buraxılıb. Həmin dövürdən ilk devalvasiyaya qədər manat dollar qarşısında stabil, yüksək məzənnədə olub.

İqtisadçı Natiq Cəfərli Modern.az saytına deyib ki, yeni əskinalsların buraxılması dövlətin siyasəti və hökumətin gələcəyə baxışı ilə əlaqədar məsələdir:

"Əgər Mərkəzi Bank və hökumət ölkədə yumşaq humanitar siyasət yeridib manat bolluğunu artırmaq yolunu tutacaqlarsa, yeni əskinaslara ehtiyac yaranacaq. Amma nəzərə almaq lazımdır ki, bu zaman da inflyasiya artacaq və dolların məzənnəsi də yüksələcək. Hələlik bu nominallarla işləməyin heç bir problemi yoxdur”.

N.Cəfərli hazırkı durumun fəsadlarının çox dərin olduğunu vurğulayıb:

"Azərbaycanda yaşanan problem 500-lük, 1000-lik əskinasların dövriyyədə olmamasından qaynaqlanmır, problemin kökü çox dərindir. Amma inflyasiyanın səviyyəsi yüksələrsə, kreditləşmənin qarşısında dayanan problemlər aradan qaldırılsa və manatın yenidən dövriyyədə daha çox olmasına qərar verilsə, bir müddət sonra yeni nominallı əskinaslara ehtiyac yaranacaq. Hələlik buna ehtiyac yoxdur, çünki qarşıda həllini gözləyən çox sayda problemlər var.

Vəziyyətdən çıxmaq üçün isə hər şey hökumətin atacağı addımlardan, hazırlayacağı təkliflər paketindən asılı olacaq. Təəssüf ki, nə ardıcıl addımlar, nə islahat paketi görürük, nə də hökumətin və Mərkəzi Bankın hədəf olaraq nə istədiyini bilirik.

Hələ ki çox asılı, müəmmalı, gələcəyə heç bir ümid yaratmayan prosesin içindəyik”.