Dövlət nəyə qənaət edəcək? - 4 illik plan

Bu barədə ölkə başçısı İlham Əliyevin sədrliyi ilə keçirilən Nazirlər Kabinetinin 2015-ci ilin yekunlarına həsr olunan iclasda maliyyə naziri Samir Şərifov bildirib.

Maliyyə naziri qeyd edib ki, ölkə daxilində və xaricində investisiya qoyuluşu xərcləri də nəzərə alınmaqla 2016-cı il və sonrakı üç il üçün ciddi qənaət rejimini təmin edəcək tarazlaşdırılmış gəlir və xərclər smetası hazırlanmalı, dövlət vəsaitlərindən qənaətlə istifadə edilməklə maliyyə nizam-intizamı gücləndirilməli, israfçılığa, izafi xərclərə yol verilməməli, həmçinin dövlət idarəetmə sisteminin təkmilləşdirilməsi, dövlət mülkiyyətində olan şirkətlərin idarəetməsində islahatların aparılması, dövlət mülkiyyətinin özəlləşdirilməsi prosesinə əlavə təkan verilməsi, bank sisteminin köklü şəkildə konsolidasiyası və ona olan etimadın artırılması kimi məsələlərin həllinə nail olunmalıdır.

Qənaət rejimi hansı istiqamətlərdə olacaq?

İqtisadçı Samir Əliyev azvision.az-a açıqlamasında bildirib ki, ilk dəfə olaraq 2016-cı ildə dövlət büdcəsi ötən il ilə müqayisədə 25 faiz aşağı salınıb. 

Ekspertin sözlərinə görə, qənaət rejiminə keçid mütləqdir: "2016-cı ilin dövlət büdcəsində neft 50 dollardan götürülüb. Neftin qiyməti isə kəskin şəkildə azalır və hazırda 30 dollardır. Bu da büdcənin icrası ilə bağlı problem yarada bilər. Qənaət rejiminin ilk təsir edəcəyi nöqtələrdən biri dövlət qurumları olacaq. Ölkə başçısının Nazirlə Kabinetinin iclasında dediyi ki, bəzi dövlət qurumlarının birləşdirilməsi və ya ləğv edilməsi gözləniləndir”.

İqtisadçı hesab edir ki, bununla dövlət qurumlarının saxlanmasına ayrılan vəsaitə qənaət etmək olar: "Həmçinin bir o qədər də priotet olmayan sahələrə vəsaitin ayrılması dayandırılmalıdır. Müxtəlif qurumlara, kommunal və nəqliyyat sektoruna ayrılan subsidiyaların azaldılması, müəyyən istiqamətlərdə tamamilə ləğv edilməsi gözlənilir.

Bir neçə istiqamətdə qənaət sistemi olacaq. Qənaət rejimində hökumət islahatlar aparacaq. Bunu hansı formada olacağını isə zaman göstərəcək”.