Prezidentin fərmanı yerli məhsullarımızın ixracına necə kömək olacaq? - AÇIQLAMALAR

İxrac təşviqləri, ya da digər adı ilə ixraca dövlət yardımları dövlətin ixracatçı şirkətlərə xaricə çıxaraq yeni bazarlar kəşf etmələrini və ixraclarını artırmalarını stimullaşdırmaq üçün verdiyi maliyyə dəstəyidir.

 

Deputat Vahid Əhmədov hesab edir ki, sözügedən fərman iş adamlarının daha çox məhsul istehsal edəcəklərinə stimul yaradacaq: "Çünki rəqabət qabiliyyətli məhsul nə qədər çox olarsa, bir o qədər yaxşı olar. Fərmanın imzalanmasında əsas məqsəd ixrac yönümlü qeyri-neft yönümlü məhsulların sayını və miqdarını artırmaqdan ibarətdir. O ki qaldı daxili bazarda istehsalın azalmasına, Azərbaycanda daxili bazarda heç bir porblem yoxdur və bundan sonra da problem olan deyil. Çünki bizim kifayət qədər məhsulumuz var. Buna görə də daxili bazarda qıtlıq yarana bilməz. Burada digər əsas məqsəd odur ki, sahibkarları cəlb edək ki, daha çox məhsul idxal etməkdə maraqlı olsunlar. Fərmanda göstərilib ki, onlara 3 faizlik güzəşt verilib. Ola bilsin, gələcəkdə bu rəqəm daha da artsın. Bu tək kənd təsərrüfatı sahələrinə deyil, bütün qeyri-neft sektoru sahələrinə aid ediləcək. Fərman Azərbaycanda qeyri-neft sektoruna ən böyük təkamül verən amillərdən biri olacaq”.

Xaricə məhsul satan iş adamlarının gömrüklə bağlı problem yaşamaları məsələsinə gəlincə, deputat hələ də müəyyən problemlərin olduğunu etiraf edib: "Amma buna baxmayaraq, gömrüklə əlaqədar müəyyən irəliləyişlərin olduğunu da deməliyik. Əgər hardasa və hansısa bir problem olursa, hansısa bir məmur, cənab prezidentin verdiyi göstərişi pozursa, artıq onlar cəzalandırılırlar. Bundan başqa Dövlət Gömrük Komitəsi "ASAN” Xidmətin rəhbəri ilə görüşüb. Bu görüşlər çərçivəsində komitə ilə ASAN xidmət arasında bəzi razılaşmalar olub ki, komitənin bir neçə xidməti ilə ASAN xidmət məşğul olsun. Demirəm ki, heç bir problem yoxdur, hər şey aradan qaldırılıb. Yox!  Ancaq irəliləyişlərin olmasını da nəzərə almalıyıq”.