Vergilər Nazirliyində yeni layihə başlayacaq - FOTOLAR

ANN.Az xəbər verir ki, vergilər nazirinin müavini Sahib Ələkbərov bildirib ki, Vergilər Nazirliyi dövlət vergi orqanları qarşısında qoyulan məqsəd və vəzifələrə nail olunması üçün insan resurslarının inkişaf etdirilməsini daim diqqət mərkəzində saxlayır: 

"Qarşıya qoyulan hədəflərə çatmaq üçün zəruri qanunvericilik, institusional və maddi-texniki baza artıq yaradılıb. 27 ay davam edən Tvinninq Layihəsinin icrası zamanı Vergilər Nazirliyinin aidiyyəti əməkdaşları insan resurslarının idarə edilməsi, risklərin analizi üçün informasiyaların toplanması və təhlili üsulları sahəsində İspaniya və Fransa vergi administrasiyalarının ən yaxşı təcrübəsini ətraflı şəkildə öyrəniblər".

Nazir müavini həmçinin qeyd edib ki, bu müddət ərzində insan resurslarının inkişafı sahəsində uzunmüddətli strategiya və tədbirlər planının layihəsi, insan resurslarının idarə edilməsi sahəsində bir sıra qaydalar, tədris-təlim proqramları, üsulları və təlim keçmək üçün metodik materiallar, o cümlədən yekun hesabat hazırlanıb, 2 kitab nəşr olunub.

 

 

S. Ələkbərov layihə üzrə görülmüş və bundan sonra görülməsi nəzərdə tutulan işlərin ölkədə aparılan islahatlar çərçivəsində vergi inzibatçılığının daha da təkmilləşdirilməsinə və vergi daxilolmalarının artımına töhfə verəcəyinə əminliyini diqqətə çatdırıb.

S. Ələkbərov bildirib ki, Azərbaycanda 2005-ci ildən vergi orqanlarına işə qəbul müsabiqə yolu ilə həyata keçirilir və bu müddət ərzində 1200 nəfərdən çox şəxs işə qəbul edilib: 

 

 

"Hazırda Nazirlik əməkdaşlarının 50%-dən çoxu bu üsulla işə qəbul edilib. Avropa İttifaqının Azərbaycandakı deleqasiyasının nümayəndəsi Jeron Uillems isə bildirib ki, Tvinninq Layihəsinin icrası müddətində 30 dövlət qurumu bu layihədən yararlanıb. Əsasən də, qadınların layihə çərçivəsində aktivliyi yüksəlib".

 

Layihə çərçivəsindən 20 mövzunu əhatə edən təlimlər keçirilib. Vergilər Nazirliyinin 150 əməkdaşının yararlandığı təlimləri 23 ispan və 12 fransalı mütəxəssis keçib. Təlimlər zamanı 5 işgüzar səfər həyata keçirilib.

 

 

Tədbirdə çıxış edən Fransa səfirinin müavini Fabyen Droyt Lozinski qeyd edib ki, növbəti il ikinci Tvinninq Layihəsinə başlanacaq.