Xidmət rəisi: "12 rayonda torpaq uçotu işlərinə başlanılıb"

"2009-cu ildən etibarən ölkənin 3 ən böyük şəhərində - Bakı, Gəncə və Sumqayıtda başlanan bütün torpaqların dəqiq kadastr və uçot işləri yekunlaşıb”. 

ANN.Az xəbər verir ki, bunu Daşınmaz Əmlakın Kadastrı və Ünvan Reyestri Xidmətinin rəisi Ramiz Quliyev bu gün "Torpaqların kəmiyyət və keyfiyyət uçotu, aqroiqlim, relyef göstəricilərindən istifadə etməklə coğrafi informasiya sistemləri (CİS) əsasında elmi əsaslarla idarə edilməsi”nə həsr olunmuş təqdimatda bildirib.

 

"Bu gün Naxçıvan MR-da müvafiq qurum tərəfindən bu işlər icra olunur. Ağ rəngli ərazilər Respublikanın 3,5 milyon hektarını əhatə edir. Bunun 3,2 milyon hektarı isə bilavasitə kənd təsərrüfatı təyinatlı ərazilərdir. Qalan 300 min hektar isə kənd yaşayış əraziləridir. Məqsədimiz o idi ki, 2010 və ondan sonrakı illərdə həmin 3,2 milyon hektar ərazinin həm kəmiyyət, həm də keyfiyyət göstəriciləri üzrə uçot işlərini yekunlaşdıraq. Eyni zamanda, 300 min hektar yaşayış ərazilərində bilavasitə torpaqların uçot işi və torpaqlarda daşınmaz əmlakın elektron kadastr məlumat bazasını formalaşdırmaqdır”. 

"Noyabrın sonunda bu istiqamət üzrə çöl ölçmə işləri yekunlaşdırılıb. Hal-hazırda icraçı şirkətlə birgə elektron kadastr bazasının yaradılması üçün məlumatların dəqiqləşdirilməsi və nəticədə, rəqəmsal kadastr mərkəzinin tamamlanma işləri aparılır. Bu ilin sonuna kimi işlər yekunlaşacaq”.