Azərbaycan kapital bazarı indeksinin tətbiqinə hazırlaşır

Bu barədə "Report”a qiymətli kağızlar bazarındakı mənbə bildirib.

Onun sözlərinə görə, yeni ilin ilk 3 ayı ərzində indeksdən istifadə qaydaları və onun hesablanma metodikasının hazırlanması nəzərdə tutulur. İşlər qaydasında getsə, növbəti ilin sonuna qədər indeksin tətbiqinə başlanıla bilər.

"Əslində, 2016-cı ilin sonuna qədər indeksin istiqrazlar üzrə test rejimində tətbiqi nəzərdə tutulurdu. Amma bu məsələni reallaşdırmaq mümkün olmadı. Çünki həm tədavül müddətinin başa çatması, həm də iqtisadi böhran nəticəsində kapital bazarında yaranmış vəziyyətlə əlaqədar istiqrazların xeyli hissəsi dövriyyədən çıxarıldı. Bu cür vəziyyətdə indeksin tətbiqi effektsiz olur”, - deyə mənbə qeyd edib.

Onun sözlərinə görə, effektiv nəticəyə nail olmaq üçün kapital bazarında Azərbaycan Dövlət Neft Şirkətinin (SOCAR) istiqrazları kimi aktiv şəkildə alınıb-satılan qiymətli kağızlar olmalıdır: "Adətən, Azərbaycanda hansısa emitent istiqraz buraxanda, kütləvi təklif belə olsa, onları əvvəlcədən adları məlum olan investorlar alır və tədavül müddətinin sonuna qədər saxlayırlar. Yəni, istiqrazlar bazarda aktiv şəkildə dövr etmir. Bu halda isə tətbiq edilən indeks demək olar ki, dəyişmir və effektiv olmur. Ümid edirik ki, gələn il kapital bazarına SOCAR istiqrazları kimi azı 5 istiqraz çıxarılacaq və indeks uğurla tətbiq olunacaq”.

Kapital bazarı indeksinin səhmlər üzrə tətbiqi isə yaxın illərdə gözlənilmir. Bunun üçün səhm bazarının aktivləşməsi lazımdır ki, bu da daha çox Azərbaycan manatının məzənnəsinin sabitləşməsindən asılıdır. Çünki, səhmlərin ticarəti milli valyuta ilə həyata keçirilir.