Devalvasiyadan sonra depozit və kreditlər belə dollarlaşıb – STATİSTİKA

ANN.Az-ın məlumatına görə, Fins.az bir neçə dövr üçün göstəriciləri təhlil edib. 

Belə ki, 2014-cü ilin 4-cü rübündə 7,7 milyard manat olan depozitlərin həcmi baş verən devalvasiyadan sonra 2016-cı ilin 1-ci rübündə 4,2 milyard manata qədər düşüb və ümumilikdə, milli valyuta ilə qoyulan depozitlərin miqdarı ötən müddət ərzində 46% azalıb. 

Xarici valyutada yerləşdirilən depozitlərin həcmi isə bu zaman müddətində 8,5% artım əldə edərək, 9,9 milyarddan 10,7 milyarda qədər artıb.

2014-cü ilin 4-cü rübü ilə 2016-cı ilin 1-ci rübünü müqayisə etdikdə kreditlərin miqdarında da əsaslı dəyişikliklərin olduğunu görürük.

Belə ki, 2014-cü ilin 4-cü rübündə milli valyuta ilə verilən kreditlərin miqdarı 13,5 milyard manat olsa da, devalvasiyadan sonra 25,3% azalaraq 2016-cı ilin 1-ci rübündə 10,1 milyard manat olub.

Lakin ötən müddət ərzində xarici valyuta ilə verilən kreditlərin miqdarında, demək olar ki, azalma müşahidə olunmayıb. 

Belə ki, xarici valyuta ilə verilən kreditlərin həcmi 2014-cü ilin 4-cü rübündə 6,4 milyard manat təşkil edib və bu həcm 2016-cı ilin 1-ci rübündə dəyişməyərək 6,4 milyard manat olub.