Maliyyə sektoruna investisiya qoyuluşu niyə azalıb? - Ekspert AÇIQLADI

Statistika Komitəsindən ANN.Az-a verilən məlumata görə, 2015-ci ilin yanvar-noyabr ayları ilə nisbətdə, 2016-cı ildə maliyyə və sığorta fəaliyyətinə investisiya qoyulması (müqayisəli qiymətlərlə) 13.7% təşkil edib. Bu, 2015-ci illə müqayisədə 86.3% azalma deməkdir. 

 

"Risklərin olması bu sahədə gəlirlərin azalmasına gətirib çıxarıb. Ümumiyyətlə, maliyyə sektoruna qoyulan vəsaitin istifadə olunması müəyyən istiqamətlərdə azalıb. Məsələn, əvvəllər kredit vəsaitləri hesabına banklar mənfəət gətirən əməliyyatlar apara bilirdilərsə, indi demək olar ki, həmin əməliyyatlar da dayanıb. Hazırda bank sektoru ən ağır dövrünü yaşayır. Belə dövrdə maliyyə sektoruna investisiya qoymaq riskli addımdır”.

 

"Bununla yanaşı, həmin sektorda kapitalın təmərküzləşməsi, konsolidasiyası  prosesi davam etdirilməlidir. Həmin sektorun sağlamlaşdırılması üçün hələ bankların bağlanma prosesi bundan sonra da aparılmaldır. Bəzi bankların mütləq şəkildə bağlanmasına nail olmaq lazımdır. Ölkə iqtisadiyyatında da vəziyyət dəyişməlidir. İqtisadi geriləmə dövründə kapital qoyuluşunun həcmi həmişə aşağı düşür. Belə durumdan isə maliyyə sektorunun ən çox əziyyət çəkən sahəsi bank bölümüdür”.

"Xarici vətəndaşların investisiya yatırımı məsələsinə gəlincə, əvvəla, ölkədə milli valyutanın özünün gerçək məzənnəsi olmalı, tarazlaşdırılmış kurs müəyyən edilməlidir. Maliyyə sektoru bazar qüvvələri ilə idarə edilməlidir ki, başqa xarici investitorlar da bu sahəyə pul qoysunlar. Bir sözlə, bank sektorunda manata etimad olmalıdır. Əgər öz vətəndaşımız milli valyutaya etimad etmirsə, inanmırsa, nəyə görə xarici vətəndaş gətirib ora vəsait qoymalıdır?!”, – deyə Q.İbadoğlu əlavə edib.

 

 

2015-ci ilin yanvar-noyabr aylarında Azərbaycanda maliyyə və sığorta fəaliyyətinə sərmayə qoyuluşu 19,8 mln. manat, 2016-ci ildə isə 2.6 mln. manat təşkil edib.  

Statistika komitəsinin məlumatına əsasən, 2016-cı ilin yanvar-noyabr aylarında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 13 009,1 mln. manat yönəldilib. Bu, 2015-ci ilin  müvafiq dövrü ilə müqayisədə 28,0% az vəsait deməkdir.