Fevralda bahalaşan və ucuzlaşan məhsullar – SİYAHI

Bu barədə Dövlət Statistika Komitəsindən Oxu.Az-a bildirilib.

Bu ilin fevral ayında yanvar ayına nisbətən istehlak məhsullarının və xidmətlərin qiymətləri 1,6%, o cümlədən ərzaq məhsullarının qiymətləri 2,5%, qeyri-ərzaq məhsullarının qiymətləri 0,9%, əhaliyə göstərilən ödənişli xidmətlərin qiymətləri isə 1% bahalaşıb.

Ay ərzində düyü, un, qarabaşaq yarması, makaron məmulatları, mal, qoyun və toyuq əti, balıq məhsulları, kolbasa məmulatları, süd məhsulları, kərə və bitki yağları, şəkər və şəkər tozu, qəhvə, çay və kakao, alma, armud, limon, portağal, naringi, banan, kələm, göyərti, xiyar, kartof, soğan, sarımsaq, yerkökü, çuğundur, spirtli içkilərin və tütün məmulatlarının qiymətlərində bahalaşma olub. 

Bundan başqa, yumurtanın qiymətində ucuzlaşma müşahidə olunub. Digər ərzaq məhsullarının qiymətlərində ciddi dəyişikliklər baş verməyib.

Fevral ayında yanvar ayı ilə müqayisədə qeyri-ərzaq məhsullarından parçalar, geyim və ayaqqabılar, inşaat materialları, mebel və ev əşyaları, zərgərlik məmulatları, xalça və digər döşəmə örtükləri, şüşə məmulatları, yemək qabları və əşyaları, məişət cihazları, kompüterlər, dəftərxana ləvazimatları, minik avtomobilləri və onlar üçün ehtiyat hissələrinin qiymətlərində bahalaşma müşahidə olunub. Digər qeyri-ərzaq məhsullarının qiymətlərində ciddi dəyişikliklər baş verməyib.