SOCAR-dan işçilərin əmək haqlarının azaldılması məsələsinə rəsmi cavab

anews.az Fins.az-a istinadən xəbər verir ki, bu barədə şirkətdə əmək haqlarının azalması ilə bağlı yazılanlara cavab olaraq SOCAR-ın açıqlamasında qeyd olunub.

"SOCAR tabeliyində olan təşkilatlarla birlikdə hər bir sahədə olduğu kimi, əməyin qiymətləndirilməsi və ödənilməsi sisteminin də günün tələblərinə cavab verməyi hədəfləyir. 

Artıq bir müddətdir ki, SOCAR-da əməyin təşkili və normalaşdırılması üzrə şirkətdaxili yeni normativ sənədlərin hazırlanması, mövcud sənədlərin Azərbaycan Respublikasının qanunvericiliyinə zidd olmadan beynəlxalq təcrübəyə uyğunlaşdırılması məqsədilə layihə qrupu yaradılıb”.

Layihə planına görə, ilk növbədə, "Azneft” İB-nin idarəetmə aparatındakı işçilərin vəzifə standartları hazırlanıb və ötən ildən etibarən bu standartlar tətbiq edilməyə başlanıb.

"Yeni standartlara uyğun olaraq, hər bir vəzifə üzrə iş analizləri aparılıb və işçilərin faktiki tutduğu vəzifələrin beynəlxalq standartlara uyğunluq dərəcəsi müəyyən edilib. Məlumat üçün bildirək ki, işçilərə yeni standartlar üzrə yenidən əməyin ödənilmə dərəcəsi və vəzifə maaşı hesablanıb. 

SOCAR rəhbərliyi, əməkdaşlarının sosial rifahının, heç bir halda, aşağı düşməsini məqbul saymadığı üçün yeni vəzifə standartlarının tətbiqi nəticəsində əməyin ödənilmə dərəcəsində azalma olan hər bir əməkdaşın maaşını müvafiq qaydada kompensasiya edəcək. 

Beləliklə də, əməkdaşlarımızın yeni ştat cədvəlləri həm beynəlxalq standartlara cavab vermiş olacaq, həm də heç bir işçimiz bu prosesdən zərər görməyəcək”.