Azərbaycanda qızıl hasilatı ilə məşğul olan şirkət planlarını açıqlayıb

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti ötən il Gədəbəy rayonu ərazisində kəşf olunan "Uğur” qızıl yatağı və hasilatı aparılan mədənlərlə bağlı planlarını açıqlayıb.

"Report”un şirkətə istinadən verdiyi xəbərə görə, plana uyğun olaraq bu ilin IV rübündə "Uğur” qızıl yatağından hasilata başlanması gözlənilir.

Şirkət mineral və filiz ehtiyatı hesabatının bu ilin III rübündə tamamlanmasına imkan verən əsas və tərs dövriyyə qazma və təhlil işlərini tamamlayıb. Məlumata görə, ətraf mühitə təsirin qiymətləndirilməsi işləri də yekunlaşıb.

İlkin hesablamalar göstərir ki, "Uğur” yatağında 195 min unsiya qızıl ehtiyatı elan edilə bilər. Torpağın üst qatının ilkin qazma işlərinə iyulun sonunda başlanacaq.

Şirkətdən digər qızıl yataqları ilə bağlı qeyd olunub ki, "Gədəbəy” yatağının daha geniş tədqiqi planlaşdırılır. Hazırda burada 61 tərs dövriyyə çuxuru üzrə işlər davam edir, iki özək qazma çuxuru isə tamamlanıb.

Şirkətdən bildirilib ki, "Qadir” yeraltı mədəni arasındakı tunel ilə "Gədəbəy” açıq yatağının aşağıya doğru uzantısının 465 metrindən 216 metri tamamlanıb.

Şirkətin 2017-ci il üzrə strategiyasının ilin IV rübündən başlayaraq hasilata müsbət təsir göstərəcəyi qeyd olunub. Bu rübdə şirkətin "Qadir” və "Qoşa” mədənlərindən hasilata yenidən başlayacağı da gözlənilir.

Qeyd edək ki, "Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. 

Müqavilə 6 yatağın - Naxçıvanda 1, Gədəbəydə 2, hazırda erməni işğalı altında olan Kəlbəcər və Zəngilanda 3 yatağın işlənməsini nəzərdə tutur. Müqavilədə Azərbaycanın payı 51%, Böyük Britaniyanın "Anglo-Asian Mining Plc." şirkətinin payı 49% təşkil edir. İlk qızıl hasilatına ("Gədəbəy" yatağında) 2009-cu ildə başlanılıb.

"Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən "Qadir” və "Gədəbəy” yatağından 50 km aralıdakı "Qoşa” yeraltı mədənlərində hasilatla məşğuldur.

Bu il şirkət Gədəbəydə geniş kəşfiyyat və hasilatın optimallaşdırılması işləri həyata keçirir. Bu çərçivədə "Gədəbəy" açıq mədənində may ayından başlayaraq hasilat azaldılıb və bu azalma ilin sonuna qədər davam edəcək.

"Qadir” yeraltı mədənində də qazma aparılması üçün bu ilin fevral ayında filiz hasilatı dayandırılıb.

"Gədəbəy” açıq mədənində tam hasilatın 2018-ci ilin əvvəlində bərpa olunması gözlənilir.

"Uğur” yatağının kəşfi barədə ötən ilin oktyabrında məlumat yayılıb. Yataq "Anglo-Asian Mining”in Qələviləşdirmə Zavodundan 3 km şimal-qərbdə yerləşir.