AMB banklararası pul bazarının formalaşdırılmasına çalışır

anews.az-ın Report-a istinadən verdiyi xəbərə görə, bunu Azərbaycan Mərkəzi Bankının baş direktoru Ziya Əliyev deyib.

O bildirib ki, banklararası pul bazarının formalaşdırılması pul bazarı, bank sistemi və bütövlükdə maliyyə sisteminin inkişafı üçün çox böyük rol oynayır və banklararası bazarda formalaşan faiz dərəcəsi də bütövlükdə pul bazarının barametrini göstərir.

"Bu həm banklara imkan verir ki, öz aktiv və passivlərini daha çevik idarə edə bilsinlər və eyni zamanda imkan verir ki, real sektor və onun ayrı-ayrı sahələrinin maliyyəyə çıxışı daha da asanlaşsın. Çünki banklararası bazarın yaxşı fəaliyyəti pulun ucuzlaşmasına, bankların aktiv əməliyyatlarını, kredit əməliyyatlarını daha çevik aparmasına imkan verir. Bu da bütövlükdə faiz dərəcəsinin aşağı düşməsinə və maliyyəyə çıxışın yaxşılaşdırılmasına gətirib çıxarır. Eyni zamanda bu Mərkəzi Bankın pul siyasəti imkanlarını yaxşılaşdırır. 

Çünki banklararası bazarın fəaliyyəti artıq MB-ya imkan verir ki, o, pul bazarının vəziyyətini daha yaxşı qiymətləndirə bilsin. Faiz dərəcəsinin iqtisadiyyatın inkişafı üçün, makroiqtisadi sabitliyin təmin olunması üçün səviyyəsini daha yaxşı görsün və digər makroiqtisadi hədəflərin idarə olunması baxımından ona təsir etmək imkanından istifadə etsin. Bu bazarın fəaliyyəti Mərkəzi Bankın pul siyasətinin, yəni pul təklifi ilə bağlı qərarlarının, apardığı monetar əməliyyatların ötürücülük qabiliyyətini yüksəldir. 

Pul siyasəti qərarları monetar əməliyyatlar real sektora daha effektiv şəkildə ötürülürsə, o zaman Mərkəzi Bankın artıq real sektor göstəricilərinə də, iqtisadi artıma da, ÜDM-in həcminə təsir etmək imkanları yaranır. Bu da imkan verir ki, MB davamlı iqtisadi inkişafda daha mühüm rol oynasın və makroiqtisadiyyatı daha çevik tənzimləmək imkanı əldə etsin. Digər orqanlarla - Maliyyə Bazarlarına Nəzarət Palatası, Maliyyə Nazirliyi və hökumətlə bərabər çalışırıq ki, bu bazarın formalaşması üçün lazım olan institutsional əsaslar tez bir müddətdə formalaşdırılsın”, - deyə Ziya Əliyev əlavə edib.