İlham Əliyevdən vacib sərəncam

Prezident İlham Əliyevin "Tütün məmulatlarının istifadəsinin məhdudlaşdırılması haqqında” imzaladığı fərman reklam şirkətlərinin işinə yarayıb.

Axar.az xəbər verir ki, fərmandan sonra bir çox qapalı məkanda tütün məhsullarının istifadəsinin qadağan edilməsini göstərən "siqaret çəkmək qadağandır” yazılı reklam lövhələrinə tələbat artıb.

Reklam şirkətlərinin sosial şəbəkələrdə paylaşdığı məlumata görə, artıq bir çox restoran, kafe, obyekt sahibləri "siqaret çəkmək qadağandır” yazılmış lövhələr sifariş verməyə başlayıb.

Qeyd edək ki, "Tütün məmulatlarının istifadəsinin məhdudlaşdırılması haqqında” fərmana görə, təhsil və tərbiyə müəssisələri, onların ərazilərində, idman yarışları keçirildiyi zallarda, restoranlar, kafelər, barlar daxil olmaqla, ictimai-iaşə obyektlərində, ticarət obyektləri, məişət obyektləri, sosial xidmət müəssisələrində, teatr və kinoteatrlarda, sirk binaları, sərgi və nümayiş salonlarında, oxu zalları, kitabxanalar, muzeylər, habelə digər mədəniyyət obyektlərində, uşaq meydançaları, yerüstü qapalı və yeraltı piyada keçidlərində, metropoliten stansiyalarının vestibülləri, keçidləri, platformaları və vaqonlarında, qapalı avtobus dayanacaq məntəqələri, liftlərdə və çoxmənzilli yaşayış binalarının ümumi istifadədə olan yerlərində, taksofonlar və yanacaqdoldurma məntəqələri, o cümlədən tezalışan maddələrin saxlandığı bina və müəssisələrdə siqaret çəkmək qadağan edilib.