Dövlət Agentliyi və Azərbaycan Beynəlxalq Bankı “Startap günləri” layihəsinə başladı

Bu təşəbbüs universitet tələbələri üçün nəzərdə tutulub. Layihə çərçivəsində ölkəmizdəki ayrı-ayrı universitetlərdə "Startap günləri” keçiriləcək. Hər hansı startap ideyası olan gənclər bura cəlb olunacaqlar. Tələbələr öz startaplarını fərdi, yaxud komanda şəklində təqdim edə bilərlər. Yetərincə əsaslandırılmış real ideyaların müəllifləri üçün "INNOLAND” İnkubasiya və Akselerasiya Mərkəzində hazırlıq təlimləri təşkil olunacaq. Bu təlimlərdə xüsusi fərqlənən gənclərə öz ideyalarını reallaşdırmaq üçün lazımi kömək göstəriləcək. 

"Startap günləri”nin aprel, may və iyun aylarında Bakı şəhərindəki Turizm və Texnologiya Peşə Liseylərində, Azərbaycan Texniki Universitetində, Lənkəran Dövlət Universitetində, Azərbaycan Dövlət İqtisad Universitetində, Gəncə və Mingəçevir şəhərlərində yerləşən universitetlərdə, Azərbaycan Dövlət Pedaqoji Universitetində, Bakı Ali Neft Məktəbində, Bakı Dövlət Universitetində, Qərb Universitetində, həmçinin  ASAN Könüllüləri Təşkilatında keçirilməsi nəzərdə tutulur. 

Azərbaycan Beynəlxalq Bankının Marketinq departamentinin direktoru Nigar Tahirova bildirib ki, bank innovativ təşəbbüsləri hər zaman dəstəkləyib və bu dəstəyi gələcəkdə də davam etdirəcək: "Startap ideyalarına malik gənclərə kömək göstərməklə biz ümumən cəmiyyətimizin gələcəyinə sərmayə qoymuş oluruq. Öz biznes layihələrini reallaşdırmağa başlayan gənclərimizin yanında olmaqdan qürur duyuruq”. 

"Startap günləri” layihəsinə iyulda təşkil ediləcək "Startap Azərbaycan” konfransı ilə yekun vurulacaq.