“FİNTEX – Maliyyə və Rəqəmsal Texnologiyalar Həftəsi” çərçivəsində Mərkəzi Bank maliyyə məhsul və xidmətlərinin məlumat-axtarış sistemini təqdim edib

Maliyyə Savadlılığı portalının (www.bizimpullar.az) tərkib hissəsi olan bu sistem istehlakçıların maliyyə məhsulları üzrə məlumatların bir mənbədən əldə etməsinə, müqayisə apararaq əlverişli məhsul və ya xidmət seçməsinə və seçim zamanı rasional qərarlar verməsinə imkan yaradan platformadır. Həmçinin məlumat-axtarış sistemi əhalinin maliyyə xidmətlərinə çıxış imkanlarının asanlaşdırılması və bu xidmətlərdən istifadənin stimullaşdırılmasına, maliyyə xidmətləri bazarında isə rəqabətin gücləndirilməsi, təqdim olunan məhsul və xidmətlərin keyfiyyətinin artırılması və şərtlərinin yaxşılaşdırılmasına töhfə verəcəkdir.

Sınaq rejimini keçmiş məlumat-axtarış sisteminə bankların qoşulması hazırda davam edir. Qeyd edək ki, qoşulan banklar əsas maliyyə məhsulları (məs. əmanət, kredit, ödəniş kartları və s.), filial və şöbələr, ödəniş terminalları və digər xidmətlər haqqında məlumatları (şərtlər və tariflər) sistemə yerləşdirir və mütəmadi yenilənməni təmin edirlər. Eyni zamanda, sistemə yerləşdirilmiş hər bir məhsul və xidmət barədə ətraflı məlumat üçün keçid linki də təqdim olunur. Bu baxımdan, maliyyə məhsul və xidmətlərinin məlumat-axtarış sistemi əhali və maliyyə institutları arasında məlumat mübadiləsi üçün effektiv vasitədir.