AZAL vətəndaşların pullarını niyə geri qaytarmır?

"Azərbaycan Hava Yolları” QSC-nin (AZAL) və onun törəmə strukturu "Buta Airways” şirkətinin koronavirus (COVID-19) pandemiyası ilə əlaqədar ləğv olunmuş reyslərinə bilet alanlar hələ də pulunu geri götürə bilməyib.

Anews.az xəbər verir ki, bu barədə report məlumat yayıb.

 

Aviaşirkət vətəndaşların pullarını qaytarmaqdan imtina edir, müştərilərə yalnız aviabiletlərin ödənişsiz qaydada yenidən təxsis edilməsini və yaxud aviabiletlərin dəyəri qədər vauçerlərlərin verilməsini təklif edir.

Aviaşirkət dövlət dəstəyi alıb

Maraqlıdır ki, AZAL-dan fərqli olaraq əksər xarici aviaşirkətlər biletlərin pullarını geri qaytarıblar. Məsələn, Macarıstanın "WizzAir” şirkəti Azərbaycan vətəndaşlarına Bakıdan və Gürcüstanın Kutaisi şəhərindən uçuş üçün aldıqları biletlərə görə çoxdan geriyə ödəniş edib. AZAL isə oxşar addımı atmağa həvəsli görünmür. Baxmayaraq ki, aviaşirkət bir qədər əvvəl koronavirusla mübarizə tədbirləri çərçivəsində dövlətdən 86,9 milyon manat məbləğində dəstək alıb.

Azərbaycan İstehlakçılar Birliyinin sədri Eyyub Hüseynova AZAL-ın vətəndaşların pullarını qaytarmamasını istehlakçı hüququnun pozulması hesab edir: "Bu, istehlakçılarının hüquqlarının kobud şəkildə pozulmasıdır. Aviaşirkət vətəndaşlarının pullarını mütləq geri qaytarmalıdır. Çox təəssüf ki, Azərbaycanda beynəlxalq sənədləri ortaya qoyaraq AZAL-ı "yerində otuzduracaq” peşəlar hüquqşünaslar yoxdur. Bununla belə, insanları İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə və yaxud bizə ərizə ilə müraciət etməyə çağırıram”.

Məsələ ilə bağlı AZAL-ın da mövqeyi öyrənilib. Aviaşirkətin prezidentinin ictimaiyyətlə əlaqələr üzrə köməkçisi Paşa Kəsəmənski bildirib ki, pandemiya ilə bağlı aviaşirkətə göstərilmiş maliyyə yardımında aviabiletlərin dəyərinin geri qaytarılması üçün xərclər nəzərə alınmayıb: "Bununla belə, oktyabrın 25-nə qədər əldə edilmiş aviabiletlərin ödənişsiz yenidən təxsis edilməsi imkanı təqdim edirik. Alternativ olaraq, biz həmçinin sərnişinlərə aviabiletin dəyərinin geri qaytarılması əvəzinə vauçer formasında pul sənədi  təklif edirik. Bu vauçeri ləğv edilmiş reysə biletin ilkin uçuş tarixindən etibarən 2 il ərzində istifadə etmək mümkündür. Vauçer AZAL-ın və "Buta Airways”in bütün istiqamətlərində etibarlıdır. Sərnişin bu şərtlərlə razılaşmadığı təqdirdə, aviaşirkət normal fəaliyyətini bərpa etdiyi vaxtdan 60 gün sonra, sərnişinlər tərəfindən alınan aviabiletlərin tam dəyərini növbəli şəkildə qaytarmağa hazırdır".