Daha 84 gənc IBA Tech Akademiyasından məzun oldu

IBA Tech Akademiyasının ikinci proqramında Azərbaycan Beynəlxalq Bankının dəstəyi ilə bu dəfə 84 tələbə təhsil alıb. Onlardan 41 nəfəri Mobil development, 43 nəfəri isə Backend üzrə intensiv kurs keçib. Yanvarda elan edilmiş proqram üzrə dərslər karantin dövrünə təsadüf etdiyindən bütün təlimlər distant qaydada aparılıb. Proqram 6 ay davam edib. Məzunların 52  nəfəri Akademiyanı fərqlənmə ilə bitirib.

Azərbaycan Beynəlxalq Bankının İdarə Heyətinin sədri Abbas İbrahimov mərasimdəki çıxışı zamanı pandemiyanın IBA Tech Akademiyasında dərslərə mane olmadığını, innovativ həllər hesabına tədris prosesinin məsafədən tam şəkildə həyata keçirildiyini bildirib. O, ötən buraxılışda bu təhsil müəssisəsindən 90 nəfər gəncin məzun olduğunu xatırladıb. Onların böyük əksəriyyətinin Azərbaycan Beynəlxalq Bankında işlə təmin edildiyini, digər bir qisminin isə başqa qurumlarda karyera həyatına başladıqlarını diqqətə çatdırıb: "İnnovativ inkişaf layihələri genişləndikcə informasiya texnologiyaları mütəxəssislərinə tələbat daha da artacaq. Biz IBA Tech Akademiyasını bu tələbatı nəzərə alaraq yaratdıq. Ölkəmizin biznes sferasında bir ilk olan bu təşəbbüsümüzün uğuru bizi innovasiyalar sahəsində yeni layihələrə ruhlandırdı. Hazırda IBA İnnovasiya Mərkəzimiz  fəaliyyətdədir və FinTech üzrə 12 startap layihəsi bu Mərkəzdə inkubasiya mərhələsindədir. Mərkəzin ilk rezidentləri sırasında Akademiyamızın ilk məzunlarından təşkil edilmiş komandalar da var. Ölkəmizdə innovasiyalar ekosisteminin inkişafına kompleks dəstək layihələrimiz isə bundan sonra da davam etdiriləcək”.