İnformasiya Texnologiyaları üzrə daha 2 yeni ixtisas qəbuluna başlandı!

ABB-nin yaratdığı Tech Akademiyasına artıq yeni qəbul başlanıb. Bu günə kimi ölkəmizdə informasiya texnologiyalarına dəstək fonunda bir neçə istiqamətlər üzrə tələbələrə proqramlaşdırma bilikləri verən ABB Tech Akademiyasında peşəkar biliklər tələb edən növbəti iki yeni proqram «Maşın öyrənmə-2» və «Proqram təminatı mühəndisliyi» sahələri üzrə kadr hazırlığı həyata keçiriləcək.

Akademiyaya qəbul olmaq istəyən şəxslər üçün www.abbtech.az   rəsmi internet səhifəsi və ya ABB Innovation Facebook səhifəsində qeyd olunan link vasitəsilə 18 Avqustdan etibarən onlayn ərizə qəbulu başlayıb. 

Qeyd edək ki, akademiyanın ümumilikdə 343 nəfərdən ibarət məzun və tələbə bazası mövcuddur. Həmçinin bu günədək ABB Tech Akademiyasından  "Back-end”, "Front-end”, "Web və Mobil Tətbiqlərin Yazılımı”, "Kibertəhlükəsizlik və Sistem İnzibatçılığı”, "DATA Analitikası”, "DevOps”, "Maşın öyrənmə-1”, "QA Avtomatlaşdırma mühəndisliyi” sahələri üzrə 300 nəfərə yaxın tələbə məzun olmuşdur. Hal-hazırda isə "Rəqəmsal Marketinq” və "UI/UX dizayn” istiqamətləri üzrə 54 tələbə təhsilini davam etdirməkdədir. Tədris proqramlarını müvəffəqiyyətlə bitirmiş tələbələr üçün yaradılan iş imkanları nəticəsində 75%-dən çox məzun istər ABB-də, istərsə də ölkənin digər qabaqcıl şirkət və müəssisələrində işlə təmin olunmuşdur. 

Mövcud təlimlərin təşkilində BP şirkəti və onun tərəfdaşlarının əvəzsiz dəstəyi davam etməkdədir. Proqramların ödənişli olmasına baxmayaraq yüksək nəticə göstərmiş tələbələrin təqaüd əldə etmək fürsəti də mövcuddur. Bununla bağlı ətraflı məlumatı akademiyanın rəsmi internet səhifəsində "tez-tez verilən suallar” bölməsindən əldə edə mümkündür. 

Tədris prosesi beynəlxalq təcrübəli mütəxəssislər tərəfindən İsrailin məşhur TELEM metodikası əsasında İsrail-Ukrayna şirkəti olan "DAN.IT” təhsil mərkəzinin  metodoloji dəstəyi ilə həyata keçirilir.

ABB Tech Akademiyasında verilən təhsil tələbələrə ixtisas bilikləri qazandırmaqla yanaşı, onların fərdi inkişafına, özlərini və layihələrini təqdim etmək bacarıqlarının təkmilləşdirilməsinə kömək edir.