“Qırmızı ürəklər” Fondunun 1 yaşı tamam oldu!

Çoxsaylı xeyirxah əməllər həyata keçirən, indiyədək minlərlə insana maddi və mənəvi dəstək göstərən, ölkənin bütün regionlarını əhatə edən "Qırmızı Ürəklər” ("Red Hearts”) Fondunun rəsmi olaraq fəaliyyətə başlamasının 1 ili tamam oldu. Bununla bağlı 16 dekabr 2021-ci il tarixində "Four Seasons” otelində tədbir keçirildi.
 
Tədbirdə PAŞA Holdinqin və Kapital Bank-ın rəhbər şəxsləri, millət vəkilləri, donorlar, xaricdə yaşayan həmvətənlərimiz, fondun üzvləri, əməkdaşları və könüllüləri iştirak edirdi. Tədbirdə çıxış edən "Qırmızı Ürəklər” Fondunun prezidenti Sevda Haqverdiyeva fondun fəaliyyət istiqamətləri, gördüyü işlər, hesabatlar və gələcək planlar barədə ətraflı məlumat verdi. Həmçinin fondun ən fəal üzvləri xüsusi sertifikatlarla təltif edildi.


İndiyədək fond tərəfindən uşaq evlərində və sığınacaqlarda seminarlar, təlimlər, aztəminatlı ailələrə yardım aksiyaları, regionlarda kütləvi ağacəkmə tədbirləri, sahilyani ərazilərdə təmizlik işləri, heyvan sığınacaqlarında dəstək aksiyaları keçirilib. "Qırmızı Ürəklər” fəaliyyətə başladığı gündən 2500 nəfərdən artıq donor tərəfindən, 300-dən artıq könüllülərin iştirakı ilə 2 milyon 200 min AZN məbləğində vəsait 15 mindən artıq insana ianələr şəklində xərclənib. 
 
44 günlük Vətən Müharibəsi zamanı və sonrakı dövrdə qazi ailələrinin uzun və qısamüddətli himayəyə alınması, şəxsin və ailə üzvlərinin təhsil xərclərinin qarşılanması, müalicəsi, birdəfəlik və çoxsaylı pul və ərzaq yardımlarının paylanması, məişət və tibbi xərclərinin qarşılanması, ev şəraitinin yaxşılaşdırılması və yeni evlərin tikilməsi işləri də həyata keçirilib. Bundan başqa birinci və ikinci Qarabağ müharibəsi zamanı şəhid olan qəhrəman oğullarımızın xatirəsini əbədiləşdirmək məqsədilə ölkənin bir sıra rayonlarında "Vətən Bağı” layihəsini həyata keçirilib. Layihə çərçivəsində hər rayonda, həmin rayonun şəhidlik zirvəsinə ucalan igidlərin sayına uyğun ağac əkilir. 


Tədbirin rəsmi hissəsi bitdikdən sonra məşhur müğənnilər Sevda Ələkbərzadə, Zamiq Hüseynov, Aygün Kazımova, Zülfiyyə Xanbabayeva, Tünzalə Ağayeva və Miriyusif çıxış edərək "Qırmızı Ürəklər”i ad günü münasibətilə təbrik etdilər. 


Qeyd edək ki, "Qırmızı ürəklər” 2019-cu ildə Kapital Bank-ın könüllü əməkdaşlarının təşəbbüsü ilə yaradılıb. Hazırda Fond kimi fəaliyyətini davam edən təşkilat, əsasən uşaq evlərinə, sığınacaqlara və digər ehtiyacı olanlara yardımlar edir. https://redhearts.az saytına daxil olmaqla fondun fəaliyyəti, gördüyü xeyirxah işlər, gələcək planları və digər maraqlı məlumatları əldə etmək olar. Xeyriyyə işlərinə ianələr etmək istəyənlər vəsaiti sayt vasitəsilə, heç yerə getmədən onlayn formada fondun hesabına köçürə bilərlər.







www.anews.az