Bank Respublika beşillik strategiyasının uğurlu nəticələrini elan etdi

2021-ci il Bank Respublika tarixində ən uğurlu illərdən biri olmuşdur. 2021-ci il üçün mənfəət 20 milyon manat həddinə yaxınlaşıb ki, bu da ötən il əldə edilmiş mənfəətdən 3 dəfədən çoxdur.


Anews.az xəbər verir ki, bu il Bank, həmçinin 2017-ci ildə təsdiq edilmiş beşillik strateji inkişaf planını uğurla tamamlayıb. Mikro, kiçik və orta biznesin inkişafı strategiyasına sadiq qalan Bank məhsul və xidmətlərin davamlı olaraq təkmilləşdirilməsi, müştəri xidmətlərinin keyfiyyətinin yüksəldilməsi, yeni rəqəmsal texnologiyaların tətbiqi və inkişafı sayəsində yüksək nəticələr əldə edib. Belə ki, bu müddət ərzində bankın kapitalı 2 dəfə artaraq 100 milyon manat həddini keçib, kredit portfeli 2,5 dəfə, müddətli depozit portfeli isə 2 dəfədən çox artıb.


Strateji plan çərçivəsində Bankın səhmdarlarının strukturunun dəyişdirilməsi prosesi də uğurla başa çatıb.


Məqsədi inkişaf etməkdə olan ölkələrdə özəl sektoru dəstəkləmək olan Deutsche Investitions und Entwicklungsgesellschaft mbh (DEG) İnvestisiya şirkəti, institusional investor kimi daxili investisiya təcrübəsinə əsasən bankın kapitalının artırılmasında iştirak etmiş və eyni zamanda bankın əsas təsisçisinə gələcəkdə öz payını almaq hüququ təqdim etmişdir. 2021-ci ildə Bankın yaxşı maliyyə göstəricilərini, inkişaf perspektivlərini və növbəti illərdə dividendlərin ödənilməsini nəzərə alaraq, bankın strateji səhmdarı DEG-in "Bank Respublika"nın kapitalındakı payını tam olaraq almışdır.


Qeyd edək ki, Almaniyanın ən böyük dövlət bank qrupu Sparkassen-Finanzgruppe törəmə şirkəti Sparkassen International Development Trust (SIDT) vasitəsilə bankın səhmdarı olaraq qalır. Bu isə, bankın yüksək korporativ idarəetmə standartlarının tətbiqində çox mühüm rol oynayır və hal-hazırda SİDT-in dəstəyi ilə Bank Respublika Azərbaycanda kənd təsərrüfatının kreditləşdirilməsinə dəstək layihəsi çərçivəsində Deutsche Sparkassenstiftung für internationale Kooperation e.V. tərəfindən həyata keçirilən texniki yardım proqramında iştirak edir.


"DEG və SIDT korporativ idarəetmə sahəsində dünya təcrübəsini gətirməklə yanaşı, "Bank Respublika”nın institusional formalaşmasında da mühüm rol oynayıb. Biz DEG investisiya şirkətinin rəhbərliyinə bankın inkişafına verdiyi əvəzsiz töhfəyə görə təşəkkürümüzü bildiririk və müxtəlif maliyyələşdirmə formalarının cəlb edilməsi üçün əməkdaşlığı davam etdirməyi planlaşdırırıq”. – deyə "Bank Respublika”nın strateji səhmdarı Natiq Quliyev qeyd edib.


Daha ətraflı məlumatı Bank Respublika”nın rəsmi saytından, facebook səhifəsindən, və yaxud 144 – Çağrı Mərkəzinə zəng edərək əldə etmək mümkündür

www.anews.az