Aİ-92 benzin idxal rüsumundan niyə azad olunub? - AÇIQLAMA

31.01.2022 14:53

Nazirlər Kabineti Azərbaycana idxal edilən Aİ-92 avtomobil benzinini gömrük rüsumundan azad edib. Dəyişikliyə əsasən, qeyd olunan benzin növü üçün hər 1000 litr üçün gömrük rüsumu 15 %-dən 0%-ə endirilib. Aİ-92 markalı benzinin idxalı zamanı aksiz vergi dərəcəsi bir ton üçün 200 manatdan 1 manata endirilib. Fevralın 1-dən tətbiq ediləcək güzəştlər iyunun 1-dək qüvvədə qalacaq.

Azərbaycanda 92 (Aİ-92) oktanlı benzin idxalı müvəqqəti olaraq gömrük rüsumlarından azad edilməsi bu növ benzinin qiymətinə təsir edə bilərmi?

İqtisadçı ekspert Asif İbrahimovun sözlərinə görə Aİ 92 markalı benzinin rüsumlardan azad edilməsi xərclərin nisbətən azaldılmasına görədir.

"Azərbaycanda neft və neft məhsullarının emal olunmasının maya dəyəri çox yüksəkdir. Biz neft və neft məhsullarının emalı üçün xammalı avropa ölkələrindən idxal edirik. İdxal edərkən də müəyyən xərclər yaranır. Xərclərdə müəyyən artımlar yaranıb.Bu cür xərclərin fonunda ötən il Tarif Şurasının qərarı ilə benzinin qiymətində 2 dəfə bahalaşma oldu. Bəzi strateji məhsullar var ki, onların qiymətini Tarif Şurası qəbul edir. Aİ 92 markalı benzinin rüsumlardan azad olunması sadəcə bu benzin qiymətinin ölkədə stabil saxlanmasına hesablanıb. Xərcləri nisbətən azaltma zərərlə işləmələrinin qarşısını alıblar.Onsuz da Aİ-92 markalı benzinin maya dəyəri yüksəkdir. Sadəcə bununla ortadakı qiymətləri tənzimləyəcəklər", deyə Asif İbrahimov bildirib.

Ekspert Natiq Cəfərli fikrincə isə , Aİ 92 benzinin rüsumdan azad olunması qiymətlərin azalması üçün deyil, əksinə qiymət artımının qarşsını almaq üçün atılan bir addımdır.

"Azərbaycanda Aİ-92 markalı benzinin qiymətini Tarif Şurası tənzimləyir. Bu vergilərdən və rüsumlardan asılı məsələ deyil. Qiymətlərdə heç bir ucuzlaşma olmayacaq. Səbəb isə başqadır. Aİ-92 benzinin yerli istehsalı xeyli azalıb. İndi Neftqayırma zavodunda da iyun ayına qədər təmir işləri olacaq. Yenidən Aİ-92 markalı benzinin istehsalı azalacaq.Biz bu növ benzini ölkəyə əsasən Rusiyadan idxal edəcəyik. Dünya bazarında neftin qiyməti ilə əlaqədar qonşu ölkədə də qiymətlər də artır. Rusiyada benzinin qiymətlərini dövlət tənzimləmir ,bazar tənzimləyir və Azərbaycan şirkətləri əsasən "SOCAR" bazar qiymətləri ilə həmin benzini alıb satışa çıxarır. Orda da qiymət artıdığından gömrük rüsumlarının 15 faizdən 0-a, aksiz vergisini isə 200 manatdan 1 manata endirdilər ki, daxildəki bazarda qiymət artımına getməsinlər", deyə Natiq Cəfərli bildirib.

Tarif Şurasının qərarı ilə 2021-ci il yanvarın 4-dən Aİ-92 markalı avtomobil benzininin pərakəndə satış qiyməti 1 litr üçün 1 manat, dizel yanacağının pərakəndə satış qiyməti isə 1 litr üçün 80 qəpik müəyyən edilib.

Gülnar Nazimqızı

www.anews.az

Xəbəri bəyəndiniz?

Sosial şəbəkələrdə paylaş