Neft və qaz BAHALAŞDI, Rus rublu isə ÇÖKÜR

Təbii qazın ICE Futures platformasında həyata keçirilən hərracda qiyməti  bu günə olan tarixi rekordu vuraraq 1 min kubmetr üçün 2 200 dolları keçdi.

Brent markalı neftin qiyməti isə  1 barrel üçün 113 dollara çatdı. Bu 2014-cü ilin iyunundan bu yana ən yüksək göstəricidir. 

Rusiyanın Ukraynaya hücumu ilə əlaqədar  rus rublu da ucuzlaşmaqda davam edir. 

1 rus rublunun 1 dollara qarşı məzənnəsi 109,5 rubl təşkil edib. 1 avronun rus rubluna nisbətən məzənnəsi isə rekord vurub. Belə ki, 1 avro hazırda Moskva birjasında 122 rubla satılır. 

Buna baxmayaraq Rusiyanın Ukrayna ərazisində hərbi əməliyyatları davam edir, hətta aktivləşir. Rusiya Müdafiə Nazirliyi Xerson şəhərinin tutulması və qondarma LXR və DXR qüvvələrinin hücumunu davam etdirməsi barədə məlumat yayıb. Xarkov rəsmiləri Rusiyanın atəşi nəticəsində 21 nəfərin öldüyünü bildirib.
    
Cavab olaraq tətbiq edilən Qərb sanksiyalarına əsasən artıq Rusiya Mərkəzi Bankının maliyyə ehtiyatları qismən bloklanıb, həmçinin Rusiya tənzimləyicisi ilə əməkdaşlığa qadağa qoyulub, bir neçə iri Rusiya bankı SWIFT sistemindən ayrılıb. 
    
Promsvyazbank-dan Yeqor Jilnikovun sözlərinə görə, sanksiyaların qüvvəyə minməsi ilə dollar təklifi azalmağa başlayıb. 

Neft bazarı iştirakçıları Rusiya neftinə spot tələbin azaldığını və alıcıların digər təchizatçılara keçməsini qeyd edirlər ki, bu da Rusiyanın ixrac gəlirlərinin azalmasına səbəb ola bilər. Eyni zamanda,  Rusiya  ilə Qərb ölkələri arasında münasibətlərin kəskinləşməsi səbəbindən Rusiya nefti olan Ural markalı neftin qiyməti də dəyişib. 
    
Qərb ölkələri enerji ixracına birbaşa sanksiyalar tətbiq etməsələr də, Nyu-York və Meksika körfəzindəki neft mərkəzlərindəki ABŞ treyderləri Rusiya neftindən imtina edirlər.    


N.Təbrizli

www.anews.az