Azərbaycan iqtisadiyyatı 2022-ci ildə 4,5% artacaq - AYİB

2022-ci ilin martında bank bu il üçün Azərbaycanın ÜDM artımını 5% səviyyəsində proqnozlaşdırmışdı.

AYİB 2023-cü ilədək Azərbaycanın ÜDM-nin artım tempini 2,5% səviyyəsində saxlayıb.

"2021-ci ildə Azərbaycan iqtisadiyyatı qeyri-neft sektoru hesabına bərpa edilib və 7,2% artıb. Qeyri-neft sektorunda iqtisadi artıma  əsasən xidmət və istehsal sahələri təkan verib.  Ümumilikdə, ötən il ölkədə ÜDM artımı 5,6% təşkil edərək gözləntiləri üstələyib.

AYİB-in məlumatına görə, birinci rübdə Azərbaycanın ÜDM-i 6,8% artıb.

Bank qeyd edir ki, ərzaq qiymətlərinin artması ölkədə inflyasiyanı 2022-ci il martn sonuna 12,2%-ə qədər sürətləndirib.

"Enerji qiymətlərinin artması həm uzun, həm də qısa müddətdə Azərbaycanda iqtisadi artımı dəstəkləyəcək. Bu, həm də ölkənin ixrac gəlirlərinin artmasına səbəb olacaq. Amma Rusiya və Ukraynaya ixrac azala bilər. Beləliklə, ÜDM-in artım tempinin 2022-ci ildə 4,5%, gələn il isə 2,5% olacağı gözlənilir. Ortamüddətli perspektivdə yüksək inflyasiyanın sabit məzənnə ilə birləşməsi qeyri-neft sektorunda rəqabət qabiliyyətinin itirilməsinə gətirib çıxara biləcəyi ilə bağlı ciddi risk var. Odur ki,  iqtisadiyyatın dəstəklənməsi vacibdir",  -  AYİB hesabatında bildirilir. 

AYİB vurğulayır ki, Azərbaycan Şərqi Avropa və Qafqaz regionunda enerji sektorunda mövcud vəziyyətdən qısa müddətdə faydalanan yeganə ölkədir.

Bank onu da qeyd edir ki, Azərbaycan hakimiyyəti un məhsullarının bahalaşmasının qarşısını almaq üçün iri taxıl idxalçılarına subsidiyalı kreditlər verib.

AYİB-in proqnozlarına görə, 2022-2023-cü illərdə Ermənistanda ÜDM-in artımı müvafiq olaraq 1,5% və 4%, Gürcüstanın isə  3% və 5% təşkil edəcək. 

Azərbaycan hökuməti 2022-ci ilə qədər ÜDM artımını 3,9% səviyyəsində proqnozlaşdırır.

2021-ci ildə Azərbaycanda ÜDM artımı 5,6% təşkil edib.