ADNSU ilə BP şirkəti arasında çərçivə sənədi imzalanıb

 

Sənəd Bakı Enerji Forumu çərçivəsində keçirilən konfransın ilk günündə imzalanıb.

 

Saziş ali təhsil proqramının həyata keçirilməsi ilə bağlıdır.

 

Proqram çərçivəsində tələbələrə bərpa olunan enerji mənbələri üzrə dərslər keçiriləcək.

 

Müqaviləni BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli və ADNSU-nun rektoru Mustafa Babanlı arasında imzalayıb.

 

"Bir müddət əvvəl BP ilə Təhsil Nazirliyi arasında müqavilə imzalanıb. Bu saziş də həmin müqaviləyə əsaslanır. Razılaşmaya əsasən, Britaniya universitetlərindən biri ilə ADNSU-nun ikili diplom magistr proqramı olacaq", - Bəxtiyar Aslanbəyli qeyd edib.

Saziş çərçivəsində yaxın 3 ildə Azərbaycanda bərpa olunan enerji sahəsində 100-dən çox mütəxəssis hazırlanacaq.

 

İyunun 1-dən 4-dək davam edəcək Bakı Enerji Həftəsi ("Baku Energy Week”) öz brendi altında 3 böyük tədbiri birləşdirib - 27-ci Beynəlxalq Xəzər Neft və Qaz, 10-cu Yubiley Xəzər Beynəlxalq Energetika və Bərpa olunan Enerji sərgiləri və Bakı Enerji Forumu. Bu il sərgilərə və forumda 30 ölkədən 249 şirkət qatılır. Forumda iştirak edən ölkələr arasında ABŞ, Almaniya, Azərbaycan, Belarus, Birləşmiş Ərəb Əmirlikləri, Böyük Britaniya, Çin, Finlandiya, Fransa, Gürcüstan, Hindistan, Niderland, İsrail, İspaniya, İsveçrə, İndoneziya, İtaliya, Qazaxıstan, Macarıstan, Norveç, Rumıniya, Rusiya, Serbiya, Səudiyyə Ərəbistanı, Sinqapur, Türkiyə, Xorvatiya, Yaponiya, Yunanıstan, Özbəkistan yer alıb.

Tədbirə ənənəvi olaraq Azərbaycanın Energetika Nazirliyi və Azərbaycan Respublikası Dövlət Neft Şirkəti (SOCAR) dəstək göstərirlər.