Rövşən Nəcəf Azərbaycanın qarşıdakı illərdə neft tələbatından DANIŞDI

Qarşıdakı bir neçə ildə neft və qaza olan tələbat sabit olaraq qalacaq. Bunu Azərbaycan Dövlət Neft Şirkətinin (SOCAR) birinci vitse-prezidenti, şirkətin prezidenti vəzifəsinin müvəqqəti icraçısı Rövşən Nəcəf Bakı Enerji Forumu çərçivəsində keçirilən konfransın ilk günündə bildirib.

"Neft-qaz proseslərində ekoloji məsələlərə diqqət edilməlidir. Təəssüf ki, qaz sektoru son illər investisiya azlığı ilə üzləşib. Amma bunu inkişaf etdirmək lazımdır", - Nəcəf deyib.

SOCAR rəsmisinin sözlərinə görə,  hazırda Cənub Qaz Dəhlizi vasitəsi ilə Azərbaycan qazı Avropaya ixrac edilir. O bildirdi ki, mövcud layihə artan tələbatı  qarşılamaq iqtidarında olmadığı üçün  bununla bağlı işlər aparılır.

"Biz tərəfdaşlar ilə  Xəzər dənizinə marağın artırılması istiqamətində danışıqlar aparırıq",- o vurğulayıb. 

SOCAR rəhbəri deyib ki, şirkətdə "yaşıl" enerji istiqamətində transformasiya prosesi 2021-ci ildə başlayıb və 2035-ci ilədək müvafiq proqram hazırlanıb.

"SOCAR öz tərəfdaşları ilə birgə təbii qaz hasilatını artıracaq. Bizim planlarımız var və bu istiqamətdə danışıqlar, texniki işlər aparılır", - şirkət rəsmisi açıqladı.

Dünən, iyunun 1-də Azərbaycan Prezidenti İlham Əliyev də Bakı Enerji Həftəsinin açılış mərasimində bildirib ki, Azərbaycan qazına olan tələbat kəskin artıb.

"Bizim potensial istehlakçılarımız başa düşməlidirlər ki, bir ilə böyük həcmdə qaz hasil etmək mümkün deyil, bunun üçün müqavilələr olmalı, danışıqlara başlanılmalı və sürətləndirilməlidir. İstehsalı artırmaq və mövcud infrastrukturu genişləndirmək üçün ənənəvi tərəfdaşlarımız olan enerji şirkətləri ilə işləmək lazımdır", Prezident vurğulamışdı.

2022-ci ilin yanvarında Azərbaycandan gömrükdə bəyan edilmiş qazın ixrac həcmi 1 milyard 613 milyon 199,82 min kubmetr təşkil edib ki, bu da 2021-ci ilin yanvar göstəricisindən 44% çoxdur.Hesabat dövründə Azərbaycandan ixracın ümumi həcminin 26,02%-i qaz ixracının payına düşüb. Azərbaycandan bəyan edilmiş qazın ixrac dəyəri $803 milyon 301,51 min (artım 8 dəfə) təşkil edib

2020-ci il dekabrın 31-dən 2021-ci il dekabrın 31-dək TAP qaz kəməri ilə Avropaya 8,1 milyard kubmetr Azərbaycan qazı ixrac edilib. Bu həcmin 6,8 milyard kubmetrdən çoxu İtaliyaya, 1,2 milyard kubmetrə qədəri Yunanıstana və Bolqarıstana tədarük edilib.


www.anews.az