Serbiya enerji nəqlinin şaxələndirilməsində Azərbaycana ümid bəsləyir

Serbiya Azərbaycanla qaz tədarükü barədə müzakirələr aparır. Bu barədə Serbiya baş nazirinin müavini, dağ-mədən sənayesi və energetika naziri Zorana Mixayloviç açıqlama verib.

"Biz Azərbaycanın energetika naziri Pərviz Şahbazovla Azərbaycan qazının interkonnektor vasitəsilə tədarükü məsələsini müzakirə etdik. Nəticələrə ümidliyik. Çünki Serbiya Rusiyadan enerji ehtiyatları tədarükündən 100% asılıdır. Belə olduqda isə tədarükü genişləndirmək bizim üçün maraqlıdır", - o əlavə etdi. 


Nazir 2018-ci ildə Azərbaycan və Serbiya arasında strateji tərəfdaşlıq haqqında bəyannamənin, daha sonra isə strateji tərəfdaşlıq haqqında fəaliyyət planının imzalandığını xatırladıb.


"Serbiya Azərbaycan qazını gələcəkdə alacaq Bolqarıstan ilə interkonnektorun tikintisini tamamlayacaq. Biz Rusiyadan asılılıqdan xilas olmaq məsələsində Azərbaycana ümidliyik", - o deyib


Zorana Mixayloviç qeyd edib ki, hazırda ölkədə alternativ enerjinin ümumi istehsalda həcmi 3,2% səviyyəsindədir və bu göstəricinin 2040-cı il üçün 40%-a çatdırılması nəzərdə tutulub.


Cari il mayın 30-da Serbiya Prezidenti Aleksandr Vuçiç deyib ki, ölkə yaxın vaxtlarda Rusiya ilə 3 illik müddətə təbii qaz alqı-satqısı üzrə yeni müqavilə imzalayacaq. 


"Bu razılaşma sayəsində qışı təhlükəsiz keçirəcəyik, həmçinin təbii qaza görə digər Avropa ölkələrindən 10-12 dəfə az ödəniş edəcəyik. Min kubmetr təbii qaz üçün 310-408 dollar ödəməyi planlaşdırırıq”, - Serbiya Prezidenti vurğulayıb.



www.anews.az