Cənub Qaz Dəhlizinə əlavə maliyyə resursları cəlb edilə bilər- NAZİR

 

"Cənub Qaz Dəhlizi layihəsində Azərbaycan hökumətinin maraqlarını eyni adlı şirkət təmsil etməkdədir. Həmin şirkətdə həm Azərbaycan hökumətinin, həm də SOCAR-ın payı var. Layihədə höküməti Maliyyə yox, İqtisadiyyat Nazirliyi təmsil etməkdədir. Qeyd etdiyim şirkət tərəfindən maliyyələşmə cəlb edilib. Hökemət maliyyə ayırmasa da, daima dəstək olmaqdadır.Yəqin ki, hər hansı maliyyə ehtiyacə yaranarsa, ilk növbədə həmin şirkətin Müşahidə Şurasında bu məsələyə baxılacaq. Düşünürəm ki,  belə bir uğurlu şirkət üçün belə bir dəstəyə ehtiyac yaranmayacaq. Amma elə bir ehtiyac yaranarsa, yəqin ki, hökumət tərəfindən bu məsələyə baxila bilər", - nazir qeyd edib.

 

Fitch Ratings" beynəlxalq reytinq agentliyinin məlumatlarına görə, 2022-ci ildə "Cənub Qaz Dəhlizi" QSC-nin maliyyə ehtiyacları layihələrdən əldə olunan gəlirlər hesabına qarşılanacaq.Cənub Qaz Dəhlizi layihəsinin maliyyələşdirilmə mənbəyi 6,5 milyard dollar məbləğində kredit və dövlət investisiyalarından ibarətdir.

"Fitch" bildirir ki, 2021-ci ildə Cənub Qaz Dəhlizi 2021-ci ildə yeni borc götürməyib, eyni zamanda, ilin sonunda onun borc yükünün 70 faizi Dövlət Neft Fondunun xeyrinə buraxılan istiqrazlar, avroistiqrazlar, 30 faizini beynəlxalq maliyyə təşkilatlarından borclar təşkil edirdi."Cənub Qaz Dəhlizinə daxil olan bütün layihələr istismara verildiyi üçün 2022-ci ildə onun pul vəsaitlərinə bütün ehtiyacları "Şahdəniz", Cənubi Qafqaz boru kəməri, Trans-Anadolu qaz kəməri (TANAP) və Trans-Adriatik qaz kəməri (TAP) layihələrindən əldə olunan gəlirlər, eləcə də toplanmış pul vəsaitləri hesabına qarşılanacaq", - agentliyin məlumatında deyilir.

"Cənub Qaz Dəhlizi"nin məqsədi "Şahdəniz” qaz-kondensat yatağının istismarının ikinci mərhələsinin işlənməsi, bu zaman hasil ediləcək təbii qazın genişləndirilmiş Cənubi Qafqaz Boru Kəməri, TANAP və TAP vasitəsilə ilkin olaraq Türkiyəyə və Cənubi Avropaya ixracını təmin etməkdir.

 

Ləman Qasımova