Gənclər yeni icbari sığorta qaydalarından narazıdır

Azərbaycan Respublikası Mərkəzi Bankının İdarə Heyətinin qərarı ilə avtonəqliyyat vasitəsi sahiblərinin mülki məsuliyyətinin icbari sığortası üzrə sığorta haqqı məbləğləri yeni qayda ilə hesablanacaq.

Sığorta haqqlarının yeni qayda ilə hesablanmasına 2022-ci il oktyabrın 1-dən başlanacaq, zərərlərin birbaşa ödənişi isə noyabrın 1-dən həyata keçiriləcək.

Azərbaycan Mərkəzi Bankının Baş direktoru Ziya Əliyev bu məsələ ilə bağlı bildirib ki, sığorta haqqı 4 əsas amil nəzərə alınaraq müəyyənləşdiriləcək.

"Birinci amil olaraq sığorta haqqının sürücülər tərəfindən daşıdığı riskin səviyyəsinə görə müəyyənləşdirilməsi nəzərdə tutulur. Əvvəla qeyd edim ki, baza sığorta haqqı, yəni 50 manat dəyişdirilmir və olduğu kimi qalır. Lakin, risk səviyyəsinə görə baza sığorta haqqına yeni əmsallar tətbiq edilir. Məlumdur ki, sürücünün yaşı və sürücülük təcrübəsi nə qədər azdırsa onun yol-nəqliyyat hadisəsi törətmək riski o qədər yüksəkdir. Ona görə də baza sığorta tarifinə yaş və sürücülük təcrübəsinə görə, 1,35-1,05 intervalında əmsallar tətbiq edilir",  - Ziya Əliyev bildirib.

Üçüncü amil nəqliyyat vasitəsinin istismar müddəti iləə bağlıdır. Daha köhnə nəqliyyat vasitələrinin yol-nəqliyyat hadisə tezliyi yüksək olduğundan istismar müddəti 10 il aşan nəqliyyat vasitələrinə 1,05, 20 ili aşan nəqliyyat vasitələrinə 1,1, istismar müddəti 10 ildən az olan nəqliyyat vasitələri üçün isə 1 əmsalı tətbiq olunur.

Dördüncü amil nəqliyyat vasitəsini idarə edənlərin sayına bağlı olaraq tətbiq olunan əmsaldır. Əgər nəqliyyat vasitəsini iki və daha artıq şəxs idarə etmək hüququna malikdirsə o zaman baza sığorta haqqına 1,15 əmsalı tətbiq edilir", - Əliyev bildirib.

"Chevrolet Cruze" markalı avtomobilin sahibi  Sənan Əlizadə razılığını bildirir. 
 
"Mənim bu sığorta ilə bağlı fikrim çox gözəldir. Əvvəl sığortaçı ilə müştəri arasında qalmaqal yaranırdı. Bundan sonra yaranmayacaq”.

Taksi sürücüsü Anar Zeynalov istənilən qərarla razılaşdığını deyir.

"17 ildir ki, taksi sürücüsüyəm. Mənim adım Xalq sığortada da, Paşa sığortada da olub. Bu vaxta kimi, qurban olum Allaha hadisə törətməmişəm. İstər Toyota Prius sürüm, istər digər maşınlar olsun haraya gedirəm yaşıl işıqdır mənim üçün. Adımı vuran kimi baxıb görürlər ki, sığorta haqqımı ödəmişəm. İndi hansı qərar verilibsə, deməli, bizim üçün xeyirlisi odur”.

Sürücü Amin Axundov isə yeni qaydalardan hələlik xəbərsiz olduğunu deyir. 

"Sığortaya münasibətim yaxşıdır. Yeni qaydanı sən indi dedin, mən də bildim. Maşınımın sığortası var, amma hələ istifadə etməmişəm. Çünki heç bir qəza törətməmişəm ki, ondan da istifadə edəm. Təzə sığortamı da bir həftə olar yazdırmışam”.

Gənc sürücü Rüfət Aslanov isə deyir ki, təcrübəsiz sürücülər təcrübəlilərdən daha çox sığorta haqqı ödəməməlidir. 

"İndi cavanlar yaşlılardan yaxşı sürür. Elə az qəza törədən də cavanlardır. Niyə cavanlar qocalardan daha çox sığorta haqqı ödəməlidir ki?! Yeni qayda məni qane etmir. Əslində cavanlara endirim olmalıdır. İş yox, güc yox.Cavanlara endirim etməkdənsə, onlara baha edirlər”.



www.anews.az