Azərbaycanda yükdaşıma artıb - DSK-dən hesabat

12.08.2022 17:25

Azərbaycanda 2022-ci ilin yanvar-iyulunda nəqliyyat sektorunda fəaliyyət göstərən müəssisələr və fiziki şəxslər tərəfindən yük daşınması ötən ilin eyni dövrü ilə müqayisədə 11,7% artaraq 120,5 milyon tona çatıb. Bu barədə Dövlət Statistika Komitəsinin rəsmi saytı yazıb.

2021-ci ilin müvafiq dövrü ilə müqayisədə yük daşınması sərnişin daşınması isə 37,6 faiz artıb 894,9 milyona çatıb.

Yüklərin 56,7 %-i avtomobil, 31,1 %-i boru kəməri, 8,4 %-i dəmir yolu, 3,6 %-i dəniz, 0,2 %-i isə hava nəqliyyatı ilə daşınmışdır. Sərnişinlərin 86,8 %-i avtomobil, 12,8 %-i metro, qalan hissəsi isə digər nəqliyyat növləri ilə daşınmışdır.

Hesabat dövründə informasiya və rabitə müəssisələri tərəfindən göstərilmiş 1508,2 milyon manatlıq xidmətlərin 75,7 %-i əhali sektoruna aid olub. 2022-ci ilin yanvar-iyulunda göstərilmiş informasiya və rabitə xidmətlərinin həcmi əvvəlki ilin müvafiq dövrü ilə müqayisədə 15,6% artmış, bu sahədə əldə edilmiş gəlirin 82,5%-i qeyri-dövlət sektorunun payına düşüb.

DSK-nın məlumatın görə, 2022-ci ilin yanvar-iyulunda pərakəndə ticarət şəbəkəsindən əhaliyə 26731,5 milyon manatlıq məhsul satılmış, xidmət subyektləri tərəfindən 4910,5 milyon manatlıq ödənişli xidmət göstərilib. 2021-ci ilin müvafiq dövrü ilə müqayisədə əmtəə dövriyyəsi 2,9%, əhaliyə göstərilmiş ödənişli xidmətlərdən əldə olunan gəlir 7,2% artmış, ticarət şəbəkəsində 15026,8 milyon manatlıq ərzaq məhsulları, içkilər və tütün məmulatları, 11704,7 milyon manatlıq qeyri-ərzaq məhsulları satılıb.

Gömrük orqanlarında qeydiyyatı aparılmış, lakin gömrük rəsmiləşdirilməsi tam başa çatdırılmamış ixrac olunan xam neft və təbii qazın statistik qiymətləndirilmiş dəyəri nəzərə alınmaqla 2022-ci ilin yanvar-iyununda ölkənin xarici ticarət dövriyyəsi 25885,6 milyon ABŞ
dolları təşkil edib. Ticarət dövriyyəsinin 19528,6 milyon dollarını və ya 75,4 %-ni ölkədən ixrac olunmuş məhsulların, 6357 milyon dollarını isə idxal məhsullarının dəyəri təşkil etmiş, nəticədə 13171,6 milyon dollar məbləğində müsbət saldo yaranmışdır. 2021-ci ilin yanvar-iyunu ilə müqayisədə xarici ticarət dövriyyəsi faktiki qiymətlərlə 73,4%, real ifadədə isə 8,1% artıb. İxrac real ifadədə 14,4% artıb, idxal isə 2,9% azalıb.

Ləman Qasımova

www.anews.az

Xəbəri bəyəndiniz?

Sosial şəbəkələrdə paylaş