Azərbaycanda at və eşşək əti satmaq mümkün olmayacaq

Aprelin sonundan başlayaraq Azərbaycanda laborator analiz nəticəsində ətin mənşəyini müəyyən etmək mümkün olacaq.Standartlaşdırma, Metrologiya və Patent üzrə Dövlət Komitəsinin mətbuat xidmətinin rəhbəri Fazil Talıblı APA-ya açıqlamasında deyib ki, Dövlət Komitəsinin Təcrübə-Sınaq Mərkəzinin (AzTEST) Yeyinti və kənd təsərrüfatı məhsullarının sınaq laboratoriyasında ətin mənşəyini müəyyən edəcək xüsusi bölmə yaradılıb.Əsas məqsədin istehlakçıların hüquqlarının qorunması olduğunu söyləyən F.Talıblı bildirib ki, ilkin mərhələdə at və eşşək ətini müəyyən etmək üçün istifadə ediləcək reaktivlər artıq xaricdən Azərbaycana gətirilib və bu ayın sonlarından başlayaraq laboratoriyada ət məhsullarının analizi zamanı at və eşşək ətini müəyyən etmək mümkün olacaq. Yaxın aylarda isə digər reaktivlər gətiriləcək və Yeyinti və kənd təsərrüfatı məhsullarının sınaq laboratoriyasının həmin bölməsində donuz ətini müəyyən etmək mümkün olacaq. Gələcəkdə digər heyvanların ətini müəyyən etmək üçün istifadə olunan reaktivlər də ölkəyə gətiriləcək.ANN.Az