Antiinhisar Xidməti Veysəloğluna maliyyə sanksiyası tətbiq edib

Xidmətin məlumatında qeyd olunur ki, topdansatış qarabaşaq bazarında hakim mövqedən sui-istifadə və qiymətlərlə manipulyasiya hallarının olması ilə bağlı araşdırma aparılıb.

Proses zamanı məlum olub ki, Veysəloğlu topdansatış qarabaşaq bazarında hakim mövqeyindən istifadə edərək satış məntəqələri arasında qiymət ayrı-seçkiliyinə yol verib. Nəticədə qarabaşaq satışı sahəsində bərabər rəqabət imkanları məhdudlaşdırıb.

"Antiinhisar fəaliyyəti haqqında” qanunun tələblərinə əsasən, "Veysəloğlu” MMC-yə qarşı 715 227 manat məbləğində maliyyə sanksiyası tətbiq edilib.

 

Veysəloğlu Şirkətlər Qrupu 1994-cü ildə satış və distribütor şirkəti olaraq fəaliyyətə başlayıb. Həmin ilin 5 noyabrında Türkiyədən TIR ilə Azərbaycana biskvit-peçenye kateqoriyasında ilk idxalı həyata keçirməklə "Veysəloğlu Distribusiya" şirkətinin əsası qoyulub. 1997-ci ildən etibarən öz fəaliyyətini genişləndirən şirkət hazırda dünyanın bir çox tanınmış markalarının 4025 çeşiddə məhsulunun ölkə üzrə distribusiyasını həyata keçirir.