Azərbaycanda illik inflyasiya pik həddinə çatıb, noyabrda yavaşıyıb

"İllik  inflyasiya oktyabrda pik həddinə çataraq  15,6% , noyabrda 15,1%  təşkil edib.  Bizim hesablamalarımız göstərir ki, yaxın aylarda inflyasiya aşağı düşəcək”, - Mərkəzi Bank faiz diapazonunun parametrləri ilə bağlı açıqlamasında bildirilib.

Mərkəzi Bank qeyd edir ki, "2023-cü il üçün inflyasiya proqnozunun bir rəqəmli olmasına baxmayaraq, inflyasiya mühiti ilə bağlı  qeyri-müəyyənlik qalmaqdadır@.

Bank qeyd edir ki, noyabrda inflyasiya 1%, baza inflyasiyası 14,7%, 12 aylıq inflyasiya isə 15,1% təşkil edib.

"Əvvəlki kimi, inflyasiyanın səviyyəsinə xarici amil əhəmiyyətli dərəcədə təsir edir. Həmçinin son 6 ayda dünya üzrə ərzaq məhsullarının qiymətləri 14% ucuzlaşıb və tərəfdaş ölkələrdə son vaxtlar orta çəkili inflyasiyada müəyyən ləngimə müşahidə olunub. Amma bu proseslərin təsiri 6-9 aydan sonra inflyasiyanın səviyyəsinə təsir edəcək”, - Mərkəzi Bank vurğulayıb.

Eyni zamanda, bank Azərbaycanda inflyasiya gözləntiləri ilə bağlı fərqli sektoral vəziyyətin olduğunu  qeyd edir. 

"Monitorinqlər göstərib ki, noyabrda oktyabr ayı ilə müqayisədə ticarət və xidmət sektorlarında inflyasiya gözləntiləri artıb, qeyri-neft sektorunda praktiki olaraq durum dəyişməyib, tikintidə isə azalıb”, - Mərkəzi Bank vurğulayıb.

Azərbaycanın İqtisadiyyat Nazirliyi Azərbaycanda orta illik inflyasiyanın 2022-ci ildə 12,5%, 2023-cü ildə 6,9% səviyyəsində olacağını proqnozlaşdırır.

2021-ci ildə Azərbaycanda orta illik inflyasiya 6,7% təşkil edib.