Azərbaycanda ev təsərrüfatlarının 82%-i inflyasiya gözləyir

"Dekabrda ev təsərrüfatları arasında aparılan sorğu göstərib ki, onların 81,9%-i inflyasiya gözləyir. Bununla yanaşı, respondentlərin 22,4%-i inflyasiyanın sürətlənəcəyinə inanır”, "İnterfaks-Azərbaycan” ölkə Mərkəzi Bankının 2023-cü il üçün pul siyasətinin əsas istiqamətləri haqqında bəyanatına istinadən xəbər verir.

Mərkəzi Bankdan verilən məlumata görə, real sektorda fəaliyyət göstərən müəssisələr arasında aparılan monitorinqlər göstərib ki, qeyri-neft sənayesində və tikintidə inflyasiya gözləntiləri azalıb, ticarət və xidmət sahələrində isə əksinə, artıb.

Mərkəzi Bank Azərbaycanda inflyasiyaya idxal faktorunun birbaşa və ya dolayısı ilə əhəmiyyətli dərəcədə təsir etdiyini qeyd edir. O cümlədən, bu ilin 10 ayı ərzində idxal olunan malların qiymətlərində illik artım 22,1% təşkil edib.

Bununla yanaşı, noyabrda illik inflyasiya 15,1%, orta illik inflyasiya 13,8%, baza inflyasiyası isə 14,7% təşkil edib.

Bundan əlavə, cari ildə inflyasiyaya ərzaq məhsullarının bahalaşması əhəmiyyətli dərəcədə təsir göstərmişdir. O cümlədən, noyabrda istehlak malları üzrə illik inflyasiya 20,1%, qeyri-ərzaq məhsulları üzrə 12,1%, xidmətlər üzrə 10,7% təşkil edib.

"Beynəlxalq ekspertlərin fikrincə, yalnız 2024-cü ildə bir çox ölkələrdə inflyasiya səviyyəsi bu ölkələrin Mərkəzi Banklarının proqnozlaşdırdığı dəhlizə qayıdacaq. Dünyadakı hazırkı geosiyasi vəziyyət yüksək qeyri-müəyyənliklə xarakterizə olunur ki, bu da inflyasiya səviyyəsinin proqnoz dəhlizlərindən kənarda qalması riskini özündə saxlayır”, - deyə Mərkəzi Bank vurğulayır.