Neftin qiyməti ucuzlaşır

Londonun ICE Futures birjasında bu gün  saat 9:08-ə olan Brent markalı neftin mart fyuçerslərinin dəyəri bir barel üçün $79,16 təşkil edir ki, bu da əvvəlki sessiyanın bağlanış qiymətindən $0,49 (0,62%) ucuzdur. Bazar ertəsi ticarət nəticəsində bu kontraktlar 1,08 dollar (1,37%) artaraq 1 barel üçün 79,65 dollar olub.

Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI markalı neftin fevral fyuçerslərinin qiyməti bu dəfə 0,40 dollar (0,54%) azalaraq 1 barelə üçün 74,23 dollar təşkil edib. Əvvəlki günün sonuna bu müqavilələrin dəyəri 0,86 dollar (1,17%) artaraq 74,63 dollar/barel təşkil edmişdi. 

Ötən həftənin sonunda Brent 8,5%, WTI 8,1% ucuzlaşıb.

Trading Economics nəşrinə görə, neft bazarında qiymətlər ABŞ Federal Ehtiyat Sistemi (FRS) rəhbərliyinin  bəyanatlarının təzyiqi altında dəyişməyə başlayıb. 

 

Belə ki, San-Fransisko Federal Ehtiyat Bankının (FRB) rəhbəri Meri Deyli bildirib ki,  ABŞ mərkəzi bankı inflyasiya ilə mübarizə aparmaq üçün uçot dərəcəsini 5%-dən yuxarı qaldırmalı olacaq.

"Düşünürəm ki, 5%-dən yuxarı səviyyə tamamilə mümkündür", -  Deyli The Wall Street Journal-a bildirib. 

Deylinin həmkarı  Rafael Bostic də uçot dərəcəsinin 5%-dən çox qaldırılacağına dair fikirləri təsdiqləyib. Hazırda uçot dərəcəsinin diapazonu 4,25-4,5% təşkil edir.

Trading Economics həmçinin yazır ki, ay təqviminə əsasən gözlənilən Yeni il öncəsi Çin vətəndaşlarının səfərlərinin artması COVİD-19-a yoluxma hallarını artıra bilər. Bu da investorlarda təşviş yaradır və dünya bazarına təsir edir.