Yasamal rayonunda Bədən tərbiyəsi və idman günü qeyd edilib

Тoplantını giriş sözü ilə  açan Yasamal rayon Gənclər və İdman İdarəsinin rəisi İlham Səfərov «Heydər Əliyev və müstəqil Azərbaycanın idman tarixi» mövzusunda çıxış etdi.

Daha sonra geniş nitqlə Yasamal Rayon İcra Hakimiyyətinin başçısı Elşad Həsənov çıxış etdi. Bildirdi ki, dünya miqyasında idman ölkəsi kimi tanınan Azərbaycan son 30 ildə qazandığı yüksək nəticələrinin təməli Ulu Öndər Heydər Əliyev tərəfindən qoyulmuşdur. İstər sovet vaxtı, istər müstəqillik illərində Heydər Əliyevin təşəbbüsü ilə ölkədə çoxsaylı idman infrastrukturları tikilib istismara verildi. Müstəqillik dövründə Ulu Öndərin sərəncamı ilə İdman və Gənclər Nazirliyi, həmçinin Milli Olimpiya Komitəsi yaradıldı. Qeyd olundu ki, bu gün bu siyasət Azərbaycan Respublikasının Prezidenti, Milli Olimpiya Komitəsinin Prezidenti cənab İlham Əliyev tərəfindən uğurla inkişaf etdirilir. Son on illiklərdə Azərbayanda çoxlu sayda olimpiya idman kompleksləri və müxtəlif idman arenaları tikilərək istifadəyə verilib. Ölkəmizdə Avropa Oyunları, "Formula-1” yarışı, Ümumdünya Şahmat Olimpiadası, İslam Həmrəyliyi Oyunları və digər nüfuzlu beynəlxalq yarışlar uğurla baş tutub. Qabaqcıl idman ölkələrindən biri olan Azərbaycan hazırda beynəlxalq Olimpiya hərəkatının fəal üzvlərindən biridir. "Saglam bədəndə - saglam ruh” şüarını xatırladan İcra başçısı idman və bədən tərbiyəsinin təbliginə xüsusi diqqət ayırmağı tövsiyyə etdi.

Daha sonra çıxış edən millət vəkili Ülvi Quliyev, YAP Yasamal rayon təşkilatının sədri Bəxtiyar Nəbiyev, Bakı şəhər Gənclər və İdman İdarəsinin rəisi Raqif Abbasov, Vətən müharibəsinin qazisi Yusif Əhmədov bildirdilər ki, dövlət başçısı tərəfindən imzalanmış sərəncamlar ölkə rəhbərliyinin idmana və idmançılara olan tükənməz qayğısının ən bariz nümunəsidir.

Tədbirin sonunda idman nailiyyətlərinə görə bir qrup idmançıya fəxri fərmanlar təqdim edildi və xatirə fotosu çəkildi.