Moskva Şahin Mustafayevlə Mher Qriqoryan arasında danışıqların yekunlarına dair

Overçukun erməni mətbuatına istinadən verdiyi məlumata görə, Azərbaycan və Ermənistan baş nazirlərinin müavinlərinin iştirakı ilə Moskvada baş tutan danışıqlar 9 saat davam edib.

"Onların nəticələrinə görə, əsas məqamlar - dəmir yolunun haradan keçəcəyi, gömrük nəzarətinin necə aparılacağı ilə bağlı razılaşma var. Adi bir dəmir yolu olacaq. Heç kim Ermənistanın suverenliyinə şübhə etmir”, - Overçuk bildirib.

Rusiya Federasiyası baş nazirinin müavini qeyd edib ki, bütün tərəflər dəmir yolunun  "erkən işə salınmasına” hazırdırlar. O, həmçinin qeyd edib ki, bu görüş nəticəsində dəmir yolunun hansı məntəqələrdən keçəcəyi, gömrük nəzarətinin necə aparılacağı ilə bağlı razılıq əldə olunub.

FSB əməkdaşlarının nəzarət və təhlükəsizlik baxımından mümkün iştirakının müzakirə edilib-edilməməsi ilə bağlı aydınlaşdırıcı suala Overçuk cavab olaraq deyib ki,  "bu, Ermənistan Respublikasından asılıdır”.

İyunun 2-də Moskvada Azərbaycan, Ermənistan və Rusiya baş nazirlərinin müavinləri - Şahin Mustafayev, Mher Qriqoryan və Aleksey Overçukun həmsədrliyi ilə regionda kommunikasiyaların bloklanması üzrə üçtərəfli işçi qrupunun iclası keçirilib.