Ötən il vergiödəyicilərinə xidmət mərkəzlərində göstərilən xidmətin sayı açıqlanıb

 

Məlumata görə, vergiödəyicilərinə xidmət mərkəzlərində 1 milyon 120 min 925 sayda xidmət göstərilib, bunlardan 287 mini şifahi, 239 mindən çoxu  elektron xidmətlərlə (bəyannamələrin və hesabatların, müxtəlif ərizələrin tərtibatına və elektron formada göndərilməsinə köməklik göstərilməsi) bağlı olub.

Ümumi elektron xidmətlərin 88,1 faizini 10 xidmət növü (şifahi və hazır sənədlərin verilməsi ilə bağlı xidmətlər istisna olmaqla) təşkil edib:

- Bəyannamələrin (hesabatların), cari vergi ödəmələrinin hesablanması barədə arayışın vergi orqanlarına təqdim edilməsi;

- Sadələşdirilmiş vergi üzrə sabit məbləğin, məcburi dövlət sosial sığorta və icbari tibbi sığorta haqqının ödənilməsi haqqında qəbzin verilməsi;

- Vergiödəyicisinin fəaliyyətinin dayandırılması;

- Qapalı zərfdə elektron sənəd mübadiləsinin aparılması üçün istifadəçi kodu, şifrə və parolun verilməsi və yenidən verilməsi;

- Vergiödəyicisinin uçot məlumatlarının dəyişdirilməsi;

- Fiziki şəxsin uçota alınması və yenidən uçota alınması;

- Asan İmza sertifikatlarının verilməsi;

- Vergiödəyicilərinə arayışların verilməsi;

- Fiziki şəxsin uçotdan çıxarılması;

- Vergiödəyicisinin fəaliyyətinin bərpası;

2023-cü ildə vergiödəyicilərindən daxil olmuş 30 minə yaxın yazılı müraciət cavablandırılıb, onlara 10,3 milyona qədər məlumatlandırma xarakterli müxtəlif növ bildiriş (məktub), mobil telefon nömrələrinə 1 milyon 645 minə yaxın SMS göndərilib. Dövr ərzində 3197 vergiödəyicisinin iştirakı ilə 289 görüş keçirilib, 5309 vergiödəyicisinə ünvanlı xidmət göstərilib.