2023-cü ildə ASCO-nun gəmiləri ilə daşınan sərnişinlərin sayı açıqlanıb

Ötən il 24 min 399 nəfər sərnişin daşınıb.

2023-cü ildə sərnişinlərin çoxu "Ro-Pax" tipli "Azərbaycan” gəmi-bərəsi ilə daşınıb. Bu gəmi ilə 6 023 nəfər mənzil başına çatdırılıb.

Keçən il ASCO-nun müştərilərə təqdim etdiyi elektron bilet xidmətindən yararlanaraq bilet alan sərnişinlərin sayı isə 99 nəfər təşkil edib. 

Həmçinin 2023-cü ildə ASCO-nun gəmi-bərələri ilə ümumilikdə 2 170 reys həyata keçirilib.

 

"Azərbaycan Xəzər Dəniz Gəmiçiliyi” (ASCO) QSC 2023-cü ildə tankerlərlə 4,9 milyon ton neft və neft məhsulları daşıyıb. 
 
2023-cü ildə Gəmiçilik tarixində ilk dəfə qiymətli kağızlar buraxaraq, "ASCO istiqrazları”nı investorlar və əhali üçün açıq bazarda təqdim edib. Qısa zamanda bu istiqrazlar üzrə bazarda tələb təklifi üstələyib.  İstiqrazlardan əldə olunan gəlir milli gəmiçiliyin Xəzərdənkənar fəaliyyətinin genişləndirilməsinə, eləcə də beynəlxalq hövzələrdə yükdaşımalar üçün yeni tipli daha böyük gəmilərin alınması layihəsi üzrə ASCO-nun payının maliyyələşdirilməsinə yönəldilib. 
 
Tankerlərin alınması milli gəmiçiliyimizə Xəzərdənkənar bazarların yeni seqmentinə daxil olması üçün şərait yaratdı. Məhdudiyyətsiz üzmə imkanlarına malik olan həmin gəmilər Azərbaycanın qürur mənbəyi olan tarixi torpaqlarının şərəfinə "Qarabağ”, "Şuşa” və "Zəngəzur” adlandırılıb. 

Ötən il ASCO universal quru yük gəmiləri 749 min ton yük daşıyıb.