AYİB Azərbaycana 30 milyon dollar kredit ayıracaq

Kredit üzrə borcalan Azərbaycan Maliyyə Nazirliyi, layihəni həyata keçirən təşkilat  isə "Azərenerji” ASC olacaq.

Layihə "Azərenerji”nin dörd yarımstansiyası üçün avtotransformator avadanlığının alınmasını nəzərdə tutur.

 

"Layihə bərpa olunan enerji potensialının inteqrasiyası üçün zəruri olan Azərbaycanın enerji sisteminin çevikliyini artırmağa kömək edəcək. Layihənin uğurla həyata keçirilməsi ölkədə bərpa olunan enerji layihələrinin inteqrasiyası üçün vacib olan şəbəkənin daha da gücləndirilməsi layihələri üçün nümunə olacaq”, - AYİB qeyd edir.

Ümumilikdə, layihə həm də yaşıl enerjiyə keçidin keyfiyyətinin yaxşılaşdırılmasına töhfə verəcək.

"Bu layihə Azərbaycanda şəbəkənin çevikliyini yaxşılaşdırmaq və bərpa olunan enerji potensialını inteqrasiya etmək üçün zəruri olan enerji sisteminin modernləşdirilməsinə yönəlmiş ilk AYİB layihəsi olacaq”, - AYİB qeyd edir.

AYİB-in məlumatına görə, bankın Direktorlar Şurası bu kreditin Azərbaycana verilməsini 2024-cü il mayın 1-də təsdiq etməyi planlaşdırır.

Azərbaycan 1992-ci ildən AYİB-in üzvüdür. Əməkdaşlıq dövründə bank Azərbaycanda 189 layihənin maliyyələşdirilməsinə 3,7 milyard avro ayırıb. 31 dekabr 2023-cü il tarixinə AYİB-in Azərbaycandakı 31 layihədən ibarət cari portfeli 897 milyon avro dəyərində qiymətləndirilir.