Azərbaycanın cari əməliyyatlar hesabının profisiti $8,3 mlrd təşkil edib

"2023-cü ilin yekunlarına görə, cari əməliyyatlar hesabının profisiti 8 milyard 329,4 dollar və ya ÜDM-in 11,5%-ni təşkil edib”, - Nəsirov cümə günü keçirdiyi brifinqdə bildirib.

Onun sözlərinə görə, 2022-ci illə müqayisədə profisit 64,5% və ya 2,8 dəfə azalıb ki, bu da 2023-cü ildə neft və qazın ucuzlaşması ilə bağlıdır.

Xüsusilə, Mərkəzi Bankın saytında dərc olunan tədiyə balansı məlumatlarına əsasən, 2023-cü ildə neftin orta qiyməti 2022-ci ildəki 103,7 dollar/bara qarşı 85,9 dollar/bar olub.

Neft-qaz sektorunda müsbət saldo 17 milyard 91,5 milyon dollar (azalma 40,4%), qeyri-neft-qaz sektorunda isə kəsir 8 milyard 762,1 milyon dollar (artım 68,9%) təşkil edib.

AMB-nin məlumatına görə, 2023-cü ildə xarici ticarət dövriyyəsinin həcmi 45,6 milyard dollar təşkil edib və Azərbaycanın xarici ticarətində 12 milyard 805,6 milyon dollar (azalma 55,4%) müsbət saldo yaranıb. Eyni zamanda, xarici ticarət dövriyyəsinin həcminin 13,4 faizi MDB ölkələrinin, 86,6 faizi isə qeyri-MDB ölkələrinin payına düşüb.

Həcmi 29 milyard 202,1 milyon dollar (azalma 30,8 faiz) olan ixracın strukturunda neft və qaz ixracı 25 milyard 935 milyon dollar (azalma 34 faiz) təşkil edib. Eyni zamanda, neftin birbaşa ixracı 16,8 milyard dollar, qazın - 8,4 milyard dollar, neft məhsullarının - 0,7 milyard dollar təşkil edib.

Həcmi 16 milyard 396,5 milyon dollar (artım 21,4%) olan idxalın strukturunda 6 milyard 477,3 milyon dolları istehlak malları (o cümlədən 1 milyard 987,1 milyon dolları ərzaq məhsulları) təşkil edib. Hesabat dövründə Azərbaycana avadanlıq və xüsusi malların idxalı 656,2 milyon dollar (artım 11,4 faiz) və ya ümumi idxalın 4 faizini təşkil edib.

2022-ci ildə Azərbaycanın tədiyə balansının cari əməliyyatlar hesabının profisiti neft və qazın yüksək qiymətləri fonunda rekord məbləğdə 23 milyard 478,1 milyon ABŞ dolları (2021-ci il göstəricisindən +2,8 dəfə) və ya ÜDM-in 23,5%-ni təşkil edib.