İstehlak səbətinə yenidən baxılmalıdır - Millət vəkili

Azərbaycanda inflyasiyanın hesablanması üçün istifadə olunan istehlak səbətinin tərkibinə yenidən baxılmalıdır. Bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında "2023-cü il dövlət büdcəsinin icrası haqqında” qanun layihəsinin müzakirəsi zamanı deputat Vahid Əhmədov deyib.

"Dövlət Statistika Komitəsi bildirib ki, bu ilin aprelində Azərbaycanda qiymət artımı olmayıb - aylıq inflyasiya 0% təşkil edib. Lakin qiymət artımı kifayət qədər yüksəkdir. Elə məhsullar var ki, insanlar bir neçə ildə bir dəfə alır, amma istehlak səbətinə daxil edilib. Səbətin tərkibinə yenidən baxıb insanların istehlak etdiyi məhsullardan ibarət səbət formalaşdırmağı təklif edirəm",  - Əhmədov bildirib. 

O həmçinin işğaldan azad olunmuş ərazilərdə çalışan şirkətlərin fəaliyyətlərinin tam şəffaf olmadığını vurğulayb. 

"Satınalma və tender məsələlərində şəffaflıq yoxdur. Bunun bağlı qanun qəbul etsək də, elektron qaydada formal tenderlər keçir və istədikləri şirkətlərə layihələri təqdim edirlər",  - Əhmədov vurğulayıb. 

O həmçinin bildirib ki, dövlət büdcəsindən işğal altında olan ərazilərin bərpası üşün ayrılan vəsait də tam mənimsənilməyib. Millət vəkili bunun səbəbləri ilə bağlı hökumətdən hesabat verməyi xahiş edib. 

N.Təbrizli

www.anews.az