Baydenin sanksiyaları Rusiyanın Çinə neft ixracını iflic edib

Son sanksiyalar Rusiyanın Sakit okeandakı Kozmino limanından Çinə göndərilən ESPO markalı neftin daşınma xərclərini beş dəfə artırıb.

Sanksiyalar tətbiq edilməzdən əvvəl neftin fraxt (daşınma) tarifi 1,5 milyon dollar idi, lakin ötən həftə bu məbləğ 5,5 milyon dollara yüksəlib. Bu gündən etibarən isə qiymət 7 milyon dollara çatıb.

Çinin limanları sanksiyaya məruz qalmış tankerləri qəbul etməkdən çəkinir. Bu marşrutdan istifadə edən gəmilərin əksəriyyətinə məhdudiyyətlər qoyulub, bu da Rusiyanın neft ticarətini pozub.

Mövcud vəziyyət Qərbi Rusiyadakı limanlardan neft daşıyan tankerləri marşrutlarını Şərq istiqamətində dəyişməyə vadar edib.

Xüsusilə Legend adlı tanker bu yaxınlarda Kozmino limanından neft daşımağa başlayıb. 20 yanvarda bu tanker limandan yük götürərək Çinin Xueycou şəhərində boşaldılmalı idi. Əvvəllər bu gəmi Ust-Luqadan və Primorsk limanlarından neft daşıyıb.

Treyderlər Reuters agentliyinə bildiriblər ki, fraxt xərclərinin artması Rusiyanın neft ticarətindən əldə etdiyi gəlirləri azaldır. Onsuz da ABŞ sanksiyaları və mürəkkəb logistika şəraiti rus neft satıcılarını təzyiq altında saxlayır.

Bundan əlavə, qış mövsümündə bölgədə tanker çatışmazlığı səbəbindən yükləmələrdə daha böyük gecikmələr baş verə bilər.

Reuters mənbələrindən biri bildirib ki, ABŞ-ın tətbiq etdiyi sanksiyalar nəticəsində Asiyaya Rusiya nefti ixracında iştirak edən 80 tanker dövriyyədən çıxarılıb.