"Şəfəq" GES ilə bağlı investisiya qərarı bu il veriləcək - BP

2025-ci ildə "Şəfəq" Günəş Elektrik Stansiyasının (GES) tikintisi üzrə yekun investisiya qərarının (FID) qəbul ediləcəyi gözlənilir. Bu səbəbdən layihə üzrə bütün əsas tikinti işlərinin bu il  başlanması planlaşdırılır.Bu barədə BP-nin Xəzər regionu üzrə vitse-prezidenti Bəxtiyar Aslanbəyli cümə günü jurnalistlərə məlumat verib.

"Yekun investisiya qərarından sonra EPC (mühəndislik, satınalma və tikinti) müqavilələri imzalanacaq, avadanlıqlar seçiləcək və 12 noyabr 2024-cü ildə təməli qoyulmuş, Azərbaycanın Cəbrayıl rayonunda yerləşən 240 MVt gücündə GES-in əsas tikinti işləri başlayacaq", –  Aslanbəyli qeyd edib.

O əlavə edib ki, minalardan təmizləmə işləri artıq başa çatıb. 

2024-cü ilin payızında Azərbaycan hökuməti ilə "Shafag (Jebrayil) Solar Limited" əməliyyat şirkəti arasında İnvestisiya Sazişi, eləcə də Azərbaycan Energetika Nazirliyi ilə "Shafag (Jebrayil) Solar Limited" arasında Torpaq İcarə Sazişi imzalanıb.

"Şəfəq" Günəş Elektrik Stansiyasının illik istehsal gücü 500 milyon kVt/saat  təşkil edəcək ki, bu da  120–150 milyon kubmetr təbii qaza qənaəti etməyə imkan verəcək.  Bununla yanaşı, illik karbon emissiyalarının 260,000–330,000 ton azalacağı proqnozlaşdırılır.

"Şəfəq" GES-in əsas səhmdarları BP (50.01%), SOCAR Green (39.99%) və Azərbaycan İnvestisiya Şirkətidir (10%).