Mərkəzi Bank valyuta hərracları ilə bağlı açıqlamaları “aktual hesab” etmir

Azərbaycan Mərkəzi Bankı (AMB) həftədə iki dəfə – çərşənbə axşamı və cümə axşamı keçirdiyi valyuta hərraclarının nəticələrini artıq ictimaiyyətə açıqlamır. Bu barədə AMB-dən Banker.az-ın sorğusuna cavab olaraq bildirilib.

Bankdan bildirilib ki, fevral ayının sonunda Mərkəzi Bankın sədri mətbuat nümayəndələri ilə görüşündə bu dəyişikliklə bağlı media nümayəndələrinə məlumat verib. Hərraclarda formalaşan məzənnənin sabit qalması və bankların valyuta tələbinin tam qarşılanması səbəbindən bu məlumatların ictimaiyyətə təqdim edilməsi artıq aktual hesab olunmur.

“Eyni zamanda qeyd etmək istərdik ki, Mərkəzi Bankın hər ayın sonuna olan valyuta ehtiyatlarının səviyyəsinə dair məlumat Mərkəzi Bankın internet səhifəsində aylıq əsasda açıqlanır. Bu məlumatın ənənəvi qaydada kommunikasiyası davam etdiriləcək”, –  məlumatda bildirilir.

AMB-nin valyuta ehtiyatları 2025-cü ilin martın əvvəlinə 10 milyard 991.8 milyon ABŞ dolları təşkil etməklə öncəki ayı 0.03 faiz üstələyib. Bununla belə, bu göstərici keçən ilin dördüncü rübünün əvvəlindəki qeydə alınan 11 milyard 795.8 milyon dollardan aşağıdır.