I rübdə Azərbaycanda orta illik inflyasiya 5,6% təşkil edib

2025-ci ilin birinci rübündə Azərbaycanda orta illik inflyasiya 5,6% təşkil edib. Bu barədə Dövlət Statistika Komitəsi məlumat verib.

Ərzaq məhsulları, içkilər və tütün məmulatları 5,7%, xidmətlər 7,8%, qeyri-ərzaq malları isə 2,7% bahalaşıb.

Mart ayında inflyasiya fevralla müqayisədə 0,6% olub. Ərzaq məhsullarının qiyməti 1,2%, qeyri-ərzaq məhsulları 0,1%, xidmətlər isə 0,2% artıb.

Ən çox bahalaşan məhsullar sırasında balıq, süd məhsulları, bitki yağları, meyvə, tərəvəz, qoz-fındıq, qəhvə, içməli su və siqaretlər olub. Un, yumurta, göyərti və xiyar ucuzlaşıb. Qeyri-ərzaq məhsulları arasında tikinti materialları, mebel və zinət əşyaları bahalaşıb, texnika – o cümlədən televizor və mobil telefonlar isə bir qədər ucuzlaşıb.

2025-ci ilin martında illik inflyasiya (ötən ilin mart ayı ilə müqayisədə) 5,9% təşkil edib. Ərzaq məhsullarının qiyməti 6,5%, xidmətlər 7,5%, qeyri-ərzaq malları 2,8% artıb.

2024-cü ildə orta illik inflyasiya 2,2% olub. 2025-ci il üçün inflyasiya proqnozu isə 4,6% təşkil edir.

N.Təbrizli